LECTURAS DEL JUEVES SANTO

LECTURAS DEL JUEVES SANTO:

Primera lectura:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 12, 1-1. 11-14

Ñandejára he’i Moisés ha Aarónpe Egíptope: Ko mes ha’éta hína peẽme guarã, áño pegua mes tenondegua. Peje opa Israel guápe: “Ko mes pegua ára 10hápe, opa óga jára to ñongatu peteĩ ovecha ra’y térã kavara ra’y hóga guápe guarã. Peteĩ óga pegua imbovy ramo ho’upa haguã, tome’ẽ hembyre hóga yke rehe oĩvape.

Ojeporavo haguã upe mymba, to ñema’ẽ mbovýpa umi ogagua ha mbovýpa ho’u jepi peteĩ teĩ. Ta upéva ovecha ra’y térã kavara ra’y mácho imarã’ỹva ha hi’áño peteĩva. Peñongatu ára 14 peve ha opa Israelgua tojuka oguahẽvo ka’aru pytũ.

Pemona huguykuépe mokõive óga rokẽ yke rehe pe’uhápe upe mymba, avei hembe’y yvategua. Upe pyharépe voi to je’u ho’o jehesy pyre, mbujape ha pohã ñana iróva reheve. Upe mbujape tojejapo trígo ku’i oñembovu’ỹvagui.

Upéicha pe’u: jeku’a jopýpe, pende py rehegua pende py rehe ha yvyra jekoha pende pópe. Ha pe’u pya’e, Tupã Ñandejára Páskua, niko hína. Che ahasáta upe pyharépe Egipto rupi ha ajukapáta Egiptogua ra’y ypykue, taha’e kuimba’e térã mymba.

Upéicha ainupãta Tupã gua’ukuéra Egipto guápe. Che hína pende Jára! Upe tuguy oĩva pende róga rokẽ rehe, ha’éta mba’e rechaukaha ha ahasakuévo ahasáta henonde rupi ha ndoike mo’ãi pende jukávo porojukahára, ainupã ramo Egíptope.

Ko ára hína mandu’arã peẽme ha pemboaretéta chéve peẽ ha pene ñemoñare. Pemboarete ko ára tembiapoukapy ramo opa árape guarã peẽme ha pene ñemoñarépe”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 115, 12-13. 15-16c. 17-18

Opavave: Mba’éicha piko ikatúta amyengovia Ñandejárape imba’e porãite hague
rehe che ndive?

Mba’éicha piko ikatúta amyengovia Ñandejárape
ha’e ipy’a porãite hague rehe che ndive?
Upe kópa ñane renohẽva vy’a’ỹgui
amopu’ãne ha hérape añembo’éne. O.

Ñandejára ombyasy ohechávo omano umi hese ojeroviáva.
Ñandejára, che niko ne rembiguái!
Ne rembiguái membyre hína che!
Nde upe che jora va’ekue iñapytĩmby aikohágui. O.

Ahepyme’ẽta ndéve che mba’e kuave’ẽ reheve.
Nde rérape, che Jára, añembo’éta.
Ajapóne umi mba’e ha’eva’ekue Ñandejárape
opa hetãygua renondépe. O.

LECTURA MOKÔIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Corintoguápe 11, 23-26
Ñandejára che mbo’e va’ekue ko’ã mba’e che ambohasáva hína peẽme. Upe pyhare Ñandejára Jesús oñemoñuhãta hápe voi, ohupi va’ekue ipópe pan, ha omomba’e guasu rire Ñandejárape, omboja’o ha he’i: “Kóva ha’e che rete, oñeme’ẽva pende rehehápe. Kóva pejapo, che rehe pene mandu’ahápe”.

Upéicha avei, ojekarupa rire, ohupi pe kópa ha he’i: “Kóva ko kópa hína pe ñe’ẽme’ẽ pyahu oñemboajéva che ruguy rupi. Péicha pejapo va’erã jepi, che rehe pene mandu’ahápe”. Aipo ramo, ou peve Ñandejára, peẽ peromandu’a imano, pe’u jave jepi ko mbujape, ha pey’u jave ko kópagui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Jn 13, 34

Opavave: Romomba’e guasu ndéve Jesucrísto. Ko tembiapoukapy ipyahúva aheja peẽme: Pejoayhúkena. Che pohayhu háicha pejoayhu avei peẽ.

Romomba’e guasu ndéve Jesucrísto.

EVANGELIO

Ñandejára Hesukrísto rekove San Juan omombe’u háicha 13, 1-15
Opavave: Romomba’e guasu ndéve, Ñandejára.

Páskua arete mboyve, Jesús oñandu oguãhẽmaha ára ha’e ohejávo ko yvy oho haguã túva rendápe. Ohayhu vaekue niko ha’e umi chupe omoirũ vaekuépe ko yvy ári, ha ohayhu chupekuéra ipahaite peve.

Pyhare Jesús osena jave hína idisípulokuéra ndive, Aña omoinge Judas, Simón Iscariote ra’y, akãme omoñuhã haguã Jesúspe. Jesús oikuaa Túva omoĩ hague opa mba’e ipo guýpe.

Oikuaa ha’e, ou hague Ñandejára rendágui ha Ñandejára rendápe jey ohotaha. Upévare, opu’ã meságui oipe’a ijahoja ha oñapytĩ iku’áre peteĩ toálla.

Upéi omoĩ y peteĩ ña’ẽme ha oñepyrũ ombojepyhéi idisípulokuérape. Upéi katu omokã pe toálla iku’áre oĩvape.

Oñembojávo Pédrore ombojepyhéi haguã chupe, ha’e he’i Jesúspe: — Maéstro, nde piko che mbojepyhéita chéve.

Jesús he’i chupe: — Ko’ágã ndereikuaa porãi hína mba’épa ajapo. Ágã upe rire ae reikuaáne.

Pedro he’i chupe: — Ndaheja mo’ãi ndéve ejohéi chéve che py.

Jesús he’i chupe: — Ndajohéi ramo ndéve nde py, mba’evéma ndereguereko mo’ãi che ndive.

Simón Pedro he’i chupe upépe: — Péicharõna maéstro, ani che py añónte ejohéi chéve. Ejohéi ave chéve che po ha upéi che akã.

Jesús katu he’i chupe: — Ojahupa ramóva niko ipotĩ, ha ojepyhéinte oikotevẽ. Opa peẽ niko
pene potĩ, oĩ ramo jepe peteĩ nahániriva.

Jesús niko he’i: “Oĩ ramo jepe peteĩ nahániriva”, oikuaágui mávapa hína pe oitýtava chupe
ñuhãme. Ha ombojepyheipa rire chupekuéra, Jesús omoĩ jey ijapére ijahoja.

Upéi katu oguapy jey mesápe, ha he’i chupekuéra: — Pehecha kuaáiko mba’épa he’ise pe ajapóva pende rehe. Peẽ niko peje chéve “Maéstro” ha “Ñandejára”, ha péicha pejérõ, añeteguánte peje.

Che niko upéva hína. Upévare, che pene Maéstro ha pende Jára, ajohéi ramo peẽme pende py, peẽ péicha avei pejapo vaerã ojupe. Che ahechauka hína peẽme mba’épa pejapo vaerã, peẽ pejapo haguã che ajapo haguéicha pende rehe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.