LECTURAS VIERNES DECIMOOCTAVA SEMANA

LECTURAS VIERNES DECIMOOCTAVA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Nahúm arandukápe oĩ háicha 2, 1-3; 3, 1-3. 6-7

Pema’ẽke! Oúma umi yvyty rupi ñe’ẽ porã reruha py’aguapy omombe’úva! Emboarete katu Judá.
Ejapo umi mba’e ere va’ekue Tupã Ñandejárape rejapotaha. Nondyry mo’ã véima iñañáva nde rehe.

Umíva oñehundipa itéma. Tupã Ñandejára niko ombovy’a jevýta Israélpe, omoakã rapu’ãta ymave guaréicha, oñemonda mboyve, ha opyta mboyve parralty hakã’ỹ vaicha.

Cháke, nde táva, tuguýpe rejahúva. Jejuka ha japúgui ne renyhẽ, ha monda opave’ỹvagui ne renyhẽva!

Pehendupa hína tukumbo ryapu, rruéda ñechiã, kavaju ñani, kárro japyhara!
Kavaju arigua, kyse puku overáva, kyse yvuku mimbi!
Heta ojekutupáva, omanóva aty guasu!

Te’õngueta opa rupi. Hesekuéra oñeñepysãnga!
Che aitýta nde rehe iky’áva.
Reñemotï etereíta. Nde rehe ojepukáta.
Ha umi nde recháva nde hegui okañýta.
Ha he’íta: “Nínive oñehundi!

Mávapa ichupe oiporiahuverekóta?
Mávapa ohóta oñandu ichupe?”

Tupã Ñandejára Ñe’ẽ.

SALMO ÑEMBOHOVÁI Deut 32, 35c-36b. 39abcd. 41

Opavave: Tupã Ñandejára ojapóta heko jojáva hetã ñemoñarépe.

Hi’aguĩma hína ára reñehundi haguã,
oguahẽmbaitéma pe oha’arõva ichupekuéra.
Tupã Ñandejára ojapóta heko jojáva hetã ñemoñarépe,
oiporiahuverekóta hembiguái kuérape. O.

Pema’ë poräke Che ko’ágã, Che año iteha,
che ykére ndaiporiha ambue Tupã.
Che upe ame’ẽva ñemano ha jeikove
che voi pe aporokutu ha aporomongueráva. O.

Ahãimbe’e ramo che kyse puku jajái,
ha Chete ambojovake
amoengoviáta che rehe oñemoĩvape,
che rehe ija’e’ỹvape aikuaaukáta. O.

ALELUIA Mt 5,10

Aleluia.
Ovy’a va’erã umi oñemoakasäséva ichupe, oikóre teko jojápe, imba’ekuerarä Sambyhy Yvágapegua.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 16, 24-28

Upe ramo Jesús he’i hemimbo’ekuérape: Oime ramo che moirũséva toñemboesarái ijehegui, tohupi ikurusu ijapére, ha ta che moirũ. Pe hekovére hakate’ỹva, omanóta. Pe omanóva che rehehápe katu, oikovéta.

Mba’épa oguenohẽne yvypóra oguerekopárõ opa ite mba’e ipópe, ha oñehundi ramo ha’e? Mba’eve! Mba’épa ikatúne yvypóra ome’ẽ oikove jevy haguã? Mba’eve! Che, yvypóraicha aju va’ekue, aju jeývo, ajúta che Túva reko mimbipa reheve ha hemimboukuéra reheve.

Ha upévo Tupã Ñandejára omoengoviáta peteĩ teĩme hembiapokue ojerure háicha. Añetehápe ha’e peẽme, ko’ápe oĩva apytépe oĩ nomano mo’ãiva che recha mboyve chéve, yvypóraicha aju va’ekue, ajúvo apórosãmbyhy haguã.

Ñandejára Jesucristo Ñe’ẽ.