LECTURAS DEL MIÉRCOLES IV DE CUARESMA

LECTURAS DEL MIÉRCOLES IV DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Isaías arandukápe oĩ háicha                   49, 8-15

Péicha he’i Tupã Ñandejára: Ou porã vove ndéve rohendúta

ha ho’a vai ramo roipytyvõta.

Che rojapo ha romoĩ nde rupi añe’ẽ me’ẽ haguã che retãgua ndive, amopu’ã jevy haguã hetã, oiko jevy haguã hikuái ijyvy teépe.

Opyta va’ekue avave’ỹre, ere haguã ojepokuávape: “Pesẽ katu!”

Ha pytũmbýpe oikóvape: “Pejechauka!”

Opa tape yke rupi ojuhúta kapi’i, ha umi yvy perõme oĩta hymba rembi’urã.

Naiñembyahýiri ha ndaijyuhéi mo’ãi, kuarahy aku ha mbyry’ái noñandu mo’ãi, pe oporo poriahuverekóva niko oisãmbyhýta, ha y hetaha rupi ogueraháta ichupe kuéra.

Opa che yvyty kuéragui ajapóta tape, ha umi tape po’i ambojojáta.

Ema’ẽ, umíva ou mombyry guio, umi ambue ou yvate guio ha kuarahy reike guio, ha umi ambueve Sinim guio.

Pesapukái joa yvága kuéra, epopo vy’águi nde, yvy, yvytykuéra pesapukái rory!

Tupã Ñandejára niko ombovy’a jevy hetã guápe, ha oiporiahuvereko mboriahu kuérape.

Sión katu he’i: “Ñandejára che reja, Tupã hesaráima che hegui.”

Peteĩ kuña piko ikatu hesarái imemby kambúgui oiporiahuvereko’ỹre upe ichugui  osẽ va’ekuépe?

Ha’e hesarái ramo jepe, che nda che resarái chéne nde hegui.

Tupã Ñandejára Ñe’ẽ.

SALMO ÑEMBOHOVÁI      144, 8-9. 13cd-14. 17-18

Opavave: Tupã Ñandejára imba’e porã ha oporo poriahuvereko.

Tupã Ñandejára imba’e porã ha oporo poriahuvereko.

Ha’e oporohayhu ha hasýpe ipochy,

opavavépe ha’e ohechakuaa, ha ohecha ramo opa hembiapokue. O.

Tupã Ñandejára nopyrũiva iñe’ẽre,

ha’e ipy’a porã opa mba’épe.

Tupã Ñandejára ojoko umi ho’ávape, ikangývape omopu’ã jevy. O.

Tupã Ñandejára heko joja opa hapépe, ha’e ipy’a porã opa mba’épe.

Ha’e oñemoaguĩ umi oñembo’évare,

umi ipy’a ite guive ichupe oñembo’évape. O.

VERSÍCULO ANTES DEL EVANGELIO Jn 11, 25a. 26

Che hína pe Jeikove jevy ha Tekove.

Pe che reroviáva nomano mo’äi araka’eve.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha 5, 17-30

Upe ramo Ñandejára Jesucristo he’i judíokuérape: Che Ru niko ndopoíri hembiapógui, upévare che avei amba’apo.

Ko’ã ñe’ẽ rehéma katu umi judío moakãhárakuéra ko’ýte ojukase Jesúspe. Ohecha hikuái Jesús nomboareteiha pytu’uha ára, ha hi’ári, oñembojoja Tupã Ñandejára ndive, he’ívo ituvaha Tupã.

Jesús he’i ichupe kuéra: “Añetehápe ha’e peẽme, Tupã ra’y ndaikatúi ojapo mba’eve ijehegui. Che ojapo upe che Ru ohecha háicha ojapo. Opa mba’e che Ru ojapóva, che ajapo avei. Che Ru niko che rayhu, ha ohechauka chéve opa mba’e ha’e ojapóva. Ha mba’e tuichavéva kóvagui katu ohechauka va’erã chéve, ha pepytáta pende jurujái.

Che Ru oporomopu’ã jevy háicha omanóva apytégui ha oporomoingove jevy háicha, péicha avei, Che amoingove umi che amoingovesévape. Ha che Ru nombojovakéi avavépe.

Upéva ha’e ohejapa che pópe, ikatu haguã opavave che momba’e, che Rúpe oñemomba’e háicha. Upe na che momba’éiva chéve, nomomba’éi avei che Rúpe, chéve che mbou va’ekuépe.”

Añetehápe ha’e peẽme: ‘Pejapysaka porã ramo umi mba’e che ha’évare ha pejerovia ramo pe che mbouharére, perekóta jeikove opa’ỹva. Ha na pe ñehundi mo’ãi, pehasáma haguére ñemanógui jeikovépe. Añetehápe ha’e peẽme, hi’aguĩma ára ha ko’ágãma voi, umi omanóva ohendu haguã Tupã Ra’y ñe’ẽ, ha umi ichupe ohendúva oikovéta.

Che Ru oporomoingove háicha, péicha avei ha’e ojapo, che aporomoingove haguã. Ha che pópe avei oheja che aporombojovake haguã, yvypóraicha aju va’ekue ko yvy ári. Ani peñemondýi ko’ã mba’ére. Oguahëta hína ára opa omanóva ohendu haguã che Ñe’ẽ, ha osẽmbáta ityvy kuéragui hikuái. Umi hembiapo porã va’ekue, opu’ã jevýta oikove haguã opa ára guarã. Umi hembiapo vai va’ekue katu, opu’ãta oñehundi haguã.

“Che ndaikatúi ojapo mba’eve che jehegui. Che aporombojovake che Ru he’i háicha chéve ajapo haguã. Ha hekopete aporombojovake, ndajapóigui che aipota háicha, che Ru che mbou va’ekue oipota háichante.

Ñandejára Jesucristo Ñe’ẽ.