LECTURAS: JUEVES IV DE CUARESMA

LECTURAS: JUEVES IV DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 32, 7-14

Tupã Ñandejára he’i Moiséspe: Nde pya’e eguejy ne retãgua renohẽ va’ekue Egíptogui ojapo ivaíva. Pya’e eterei ojei hikuái che rapégui. Ojapo tóro ra’y órogui, oñesũ henondépe, ogueru ichupe imba’e kuave’ẽ ha he’i joa: “Israel, kóva hína tupã ne renohẽ va’ekue Egíptogui”.

Tupã Ñandejára he’i avei Moiséspe: Ahecha ha’e kuéra oikoseha iñakã rehénte voi. Eheja ta hendy che pochy ha tambokusugue ichupe kuéra, nde hegui katu ajapóta peteĩ tetã guasu.

Moisés katu oha’ã ombopochy jera Tupã Ijárape ha he’i: Mba’ére piko che Jára rehejáta hendy nde pochy ne retã guáre, renohẽ va’ekue Egíptogui tuicha pokatu reheve ha pyapy mbaretépe?

Mba’e piko he’íta nde rehe Egiptogua? Rehejáta piko he’i py’a ñaña reheve renohẽ hague reraha mombyry rejuka yvytýpe, rehapo’o haguã ichupekuéra yvy árigui? Eñemboesaráina nde pochy rendýgui ha ani rejapo mba’eve ivaíva ne retã guáre.

Ne mandu’ána ne rembiguái Abraham, Isaac ha Jacob rehe, ichupe kuéra niko reme’ẽ va’ekue ne ñe’ẽ erévo: “Ambohetáta pene ñemoñare mbyja ita yvágape guáicha. Ko yvy ha’e va’ekue ame’ẽtaha peẽme, ame’ẽta pene ñemoñarépe imba’e tee ramo opa árape guarã”.
Tupã Ñandejára ombyasy jevy ha oheja rei hetãgua rembiapo vaikue.

Tupã Ñandejára Ñe’ẽ.

SALMO ÑEMBOHOVÁI 105, 19-23

R. Tupã Ñandejára ndahesaráiri iñe’ẽgui

Yvyty Horébpe ojapouka hikuái tóro ra’ãnga,
ha pe ta’ãnga órogui ijejapo pyre omomba’e hikuái.
Upéicha omyengovia hikuái Tupã Ñandejárape,
heko mimbipávape, tóro kapi’i ho’úva ra’ãngáre. R.

Hesarái hikuái Tupãgui, oguenohẽ va’ekue ichupe kuéra jejopy vaígui, tuicha ite mba’e ojapo va’ekue Egíptope,
mba’e hechapyrãva ojapo va’ekue Canaánpe
ha mba’e ojehecha’ỹva Mar Rójope. R.

Tupã Ñandejára ohundi mo’ã ichupe kuéra,
hembiporavo Moisés katu
oñemoĩ haperãme pyapy mbaretépe
ha upéicha ojoko, Tupã Ñandejára pochy. R.

VERSÍCULO ANTES DEL EVANGELIO Jn 3, 16

Tupã Ñandejára ohayhu eterei yvypórakuérape, hesehápe ome’ë Ta’ýra peteïme; ikatu haguäicha mayma hese ojeroviáva oreko Tekove ijapyra’ÿva.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha

5, 31-47

Upe ramo Jesús he’i Judíokuérape: Che añe’ẽ ramo che jehe voi, upe che ha’éva che jehe naiporãi mba’everã. Oĩ katu ambue oñe’ẽva che rehehápe, ha upe ha’e he’íva che rehe aikuaa añeteha. Peẽ peporanduka va’ekue Juánpe, ha upe ha’e he’i va’ekue che rehe añetegua hína.

Naikotevẽi jepe niko che mba’eve avave he’ívare. Ha’énte peẽme ko’ã mba’e ikatu haguã Tupã Ñandejára pene pysyrõ. Juan niko ojogua va’ekue ku mba’e rendýpe ohesapéva, ha peẽ katu pevy’ase sapy’a va’ekue hesapépe. Che katu areko peteĩ oñe’ẽ porãvéva che rehe Juángui.

Upe che ajapóva niko hína, pe che Ru ome’ẽ va’ekue chéve ajapo haguã, ha upéva ohechauka che Ru che mbou hague. Ha che Ru voi, pe che mbouhare, oñe’ẽ che rehehápe, jepe peẽ araka’eve napehendúiva ichupe, térã pehecha ichupe, ha napeñongatúi pe iñe’ẽ pende pype, napejeroviáigui upe che Ru ombou va’ekuére.

Peẽ niko peñeha’ã peñemoarandu Ñandejára ñe’ẽme, peimo’ãgui upépe pejuhutaha jeikove opa’ỹva. Ha jepe umíva oñe’ẽ che rehe, peẽ ndapejuséi che rendápe pereko haguã pe jeikove.”

“Che ndaguerohorýi ete yvypóra che momba’érõ. Hi’ári, poikuaa porã peẽme, ha aikuaa ndapehayhuiriha Tupãme. Che niko aju che Ru rérape, ha peẽ ndapeikuaaséi che hegui mba’eve. Oï ramo oimeraẽva oúva ijehegui reínte, upévape katu pemoguahẽne.

Peẽ pevy’a pende rapicha pene momba’e ramo, ha ndapehekái pe ha’eño ite Tupãva, ha’e pene momba’e haguã. Mba’éicha piko péicha ramo pejeroviáta che rehe? Ani peimo’ã che pomoĩ vaitaha che Ru renondépe. Upe pene moĩ vaítáva niko Moisés voi hína, peẽ pejeroviaha.

Perovia rire umi mba’e Moisés omoĩ va’ekue kuatiáre, pejerovia va’erã mo’ã che rehe. Che rehe niko Moisés imandu’a va’ekue. Ha ndaperoviái ramo upe ha’e omoĩ va’ekue kuatiáre, piko mba’éicha peroviáta umi mba’e che ha’éva peẽme?”

Ñandejára Jesucristo Ñe’ẽ.