LECTURAS DOMINGO 7º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Samuel aranduka peteĩháme oĩ háicha 26, 2. 7-9. 12-14. 22-23

Saúl oiporavo 3.000 ñorairõhára Israelgua ha oho desierto Zífpe David rekávo. Pe pyharépe voi David ha Abisai oho tekohápe. Saúl oke hína ha iñakãngyta yke rehe oguereko ikyse puku ojejakutúva yvy rehe. Abner ha hendivegua oñeno ijere rehe.

Upe ramo Abisai he’i Davídpe: Ko árape Tupã omoĩ nde pópe nde rehe ija’e’ỹvape. Eheja chéve tajuka ko’ágã ha tajakutu ichupe yvy rehe ikyse puku teépe. Peteĩ hýupente ajapóta ha natekotevẽ mo’ãi ambojo’a.

David katu he’i ichupe: Ani rejuka. Ndaipóri avave ojukáva mburuvicha guasúpe Tupã oiporavo va’ekue, opytáva oñenupã’ỹre.

David ipojái kyse puku ha y ryru rehe oĩva Saúl akãngyta yke rehe ha oho hikuái. Avave ndohechái ha nohendúi ichupekuéra; avave ndopáyri.

Tupã niko omonge hatã ra’e ichupekuéra. David ohasa upe ñu mboypýri, oñemoĩ pe sérro ru’ãme, ha opyta mombyrymi ichuguikuéra. Upéma ramo David osapukái Abner ha iñorairõhárakuérape: Abner! ¿Che rendúpa hína?

Abner he’i: ¿Máva piko nde, resapukái haguã mburuvicha guasúpe?

David he’i ichupe: Kóina ápe nde kyse puku che ruvicha. Tou peteĩ ne rembiguái ipiári, ha Tupã to myengovia peteĩ teĩme hembiapokue rehe. Tupã ne moĩ ramo jepe che pópe, namopu’ãséi kuri che po upe mburuvicha guasu ha’e oiporavo va’ekue rehe.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 102, 1-4. 8. 10. 12-13

Opavave: Ñandejára imba’e porã ha ñande poriahuvereko.

Amomba’e guasu Tupãme che py’aite guive,
che py’a ite guive amomba’e guasu héra marangatu.
Amomba’e guasu Tupãme che py’aite guive,
nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapo vaikue
ha che mongueráva opaichagua mba’asýgui.
Ha’e ndo hejái apa yvykuápe
ha mborayhúpe che añuã ha che mokunu’ũ. O.

Tupã imba’e porã ha ñande poriahuvereko,
ndaipochy reíri ha oporohayhu.
Nomyengoviái ñandéve ñane angaipa,
ha ndojapói ñande rehe ojapo haguãicha. O.

Kuarahy resẽ mombyryháicha kuarahy reikégui,

upéicha omomombyry ñande hegui ñane angaipa.
Túva omokunu’ũ háicha ta’ýrakuérape,
upéicha avei Tupã umi ichupe omomba’éva ndive. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 15, 45-49

Ñandejára Ñe’ẽ he’i kóicha: “Pe kuimba’e ypykue, Adán, Tupã ojapo va’ekue peteĩ oikovéva ramo. Ha pe Adán ipaha pegua katu, ha’e espíritu oporo moingovéva.

Opáichavo, espíritu reheguáva ndaha’éi tenondegua. Yvy rehegua pe tenondeguáva, ha upéi pe espíritu reheguáva. Pe kuimba’e ypykue, ojejapo va’ekue yvýgui, yvy arigua va’ekue. Pe kuimba’e upe rire guáre katu, yvága pegua.

Umi yvy ariguáva, ojogua pe kuimba’e yvýgui ojejapo va’ekuépe. Ha umi yvága peguáva katu, ku yvágape ojejapo va’ekuépe. Jajogua háicha pe kuimba’e yvýgui guarépe, péicha avei jajogua pe yvága guápe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 13, 34
Aleluia.
Ko tembiapoukapy ipyahúva aheja peẽme: Pejoayhu kena. Ha che pohayhu haguéicha pejoayhu avei peẽ. He’i Ñandejára.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 6, 27-38
Opavave: Romomba’e guasu ndéve, Ñandejára.

Upérõ Jesús he’i idisípulokuérape: Pehendúke ko ha’éva peẽme. Pehayhu umi pende rayhu’ỹvape, ha pejapo iporãva umi pende rehe ija’e’ỹvare. Pejerure Ñandejárape tohovasa umi pende rehe oñe’ẽ vaívape, ha peñembo’e umi pende ja’óvare.

Oĩ ramo nde rova petéva, eheja tanderova pete jovái. Ha oimérõ oipe’áva ndehegui nde ahoja, eheja togueraha nde ao ave. Oimérõ omba’e jeruréva ndéve, eme’ẽ chupe. Ha oimérõ oipe’áva ndehegui nemba’éva, ani ejerure chupe ome’ẽ jey haguã ndéve. Pejapo pende rapicháre upe peẽ peipotáva ojejapo pende rehe.

Peẽ pehayhúrõ umi pende rayhúvapente, piko mba’e iporãva pejapo. Umi mba’e vai apoha jepe niko péicha ojapo. Ha pejapórõ iporãva pende rapichápe pende rehe ojapo porã haguérente, piko mba’e iporãva oĩ upévape.

Umi mba’e vai apoha jepe niko péicha ojapo. Ha peiporukárõ umi omyengovia jeýtava peẽmente, pejapo nga’u piko upéicharõ tuicha mba’e. Umi mba’e vai apoha avei niko oiporuka ojupe, oha’arõgui ojeporuka jey avei chupe. Pehayhu va’erã pende rayhu’ỹvape. Pejapo iporãva ha peiporuka peha’arõ’ỹre mba’eve hekovia.

Upéicharõ, tuicha jopói Ñandejára ome’ẽta peẽme. Ha peikóta Ñandejára ra’y ramo. Ha’e niko ipy’a porã ha ohecha kuaa heko vai ha iñañávape. Peiporiahuvereko vaerã opavavépe, pende Ru pende poriahuvereko háicha peẽme.

Ani pemoĩ vai pende rapichápe, ndapeipotáirõ Ñandejára pene moĩ vai peẽme. Ani pejopy vai pende rapichápe, ndapeipotáirõ Ñandejára pende jopy vai peẽme. Peheja rei hembiapo vaikue pende rapichápe, ha Ñandejára oheja reíne peẽme pene rembiapo vaikue.

Oikotevẽvape peme’ẽ, ha Ñandejára ome’ẽne peẽme peikotevẽva. Ipojeráne pene ndive ha ome’ẽne peẽme pende vosa renyhẽ chovi. Peẽ pejapoháicha pende rapicháre, upéicha Ñandejára omyengovia jeýne peẽme.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.