LECTURAS SÁBADO 6º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ Santiago ohai va’ekue 3, 1-10

Che pehẽnguekuéra: Anikena oĩ pende apytépe heta eterei mbo’ehára. Jaikuaáma voi niko ñande japoro mbo’évape Tupã Ñandejára ñane mbojovake pohyivetaha. Maymáva jajavy heta, ha oimérõ ojavy’ỹva he’ívape, upéva kuimba’e hekopegua, oikuaáva avei mba’éichapa ipu’aka va’erã hetére. Ñamoi ramo ijurupegua kavajúpe, ñamboguata jaipotaha rupi. Ha pema’ẽmi avei umi yga ypeguáre.

Tuichaichárõ jepe, ha yvytu oipeju pochýrõ, pe imboguataha peteĩ yvyra pehẽngue míme ogueraha pe mbayru ha’e oipotaha rupi.

Upéicha avei pe ñane kũ, peteĩ mba’e ñande rete rehegua michĩmíva, ipu’aka heta mba’ére. Peteĩ tata piririmi ikatu ohapypa peteĩ ka’aguy guasu. Ha ñande juru niko tatáicha.

Peteĩ mba’e vai rapo oĩva ñande retére, ñane mongy’apáva, hendýva aña retã ratápe rupi voi ha ohapýva ñande rekove. Pe yvypóra ikatu ipu’aka opaichagua tymba, guyra, mbói ha umi yguasu peguáre. Ha ipu’aka voi katu hesekuéra. Ikũre katu ndaipóri ipu’akáva. Upéva peteĩ mba’e vai ojejoko kuaa’ỹva, henyhẽtéva pohã vai oporojukávagui.

Ñande juru rupi ñamomba’e guasu háicha Ñandejára ñande Rúpe, ñañe’ẽ vai yvypóra, Tupã Ñandejára rembiapokue ha ijoguahávare. Ñande jurúgui osẽ ñe’ẽ porã ha ñe’ẽ vai. Che pehẽnguekuéra, nda upéicha va’erãi.

Tupã Ñandejára Ñe’ẽ.

SALMO ÑEMBOHOVÁI 11, 2-5. 7-8

Opavave: Tupã Ñandejára, ore renohẽkena jejopy vaígui.

Tupã Ñandejára, ore renohẽkena jejopy vaígui.
Opáma niko umi nde rehe ojeroviáva,
ha ndaipóri véima imarangatúva, maymávante
ijapu hapichápe, juru he’ẽ ha tova mokõime oiko hikuái. O.

Tupã Ñandejára tojuru’o iñe’ẽ guasúvape,
toiko’õ oporombojuru he’ẽvape.
Umi he’ívape: “Ore roñe’ẽ kuaa hína. Roikuaa ro’éva.
Máva piko oñemoĩta ore rehe?” O.

Ñandejára he’íva niko añete ha hesakã,
ojogua plátape oñemboyku jevy jevýva ipotĩ haguã.
Ñandejára, nde reñangarekóta ore rehe,
nda ore reja mo’ãi ro’a umíva pópe. O.

ALELUIA Cf. Mc. 9, 7
Aleluia.
Pe yvága ojepe’a ha oñehendu Tupã ñande Ru he’írö: “Kóva hína che Ra’y ahayhu etéva, pehendu ichupe.”
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Marcos omombe’u háicha 9, 2-13

Upe ramo Jesús oho peteĩ yvyty yvatépe ha ogueraha hendive Pedro, Santiago ha Juánpe. Upépe henondépe kuéra, Jesús rete oñemoambue ohóvo. Ijao overa hendy ha morotĩ asy, ndaipóri chéne avaveichagua ao joheiha yvy ári ikatu va’erã péicha omomorotĩ. Ha ohecha hikuái Elías ha Moiséspe, oñemongetáva hína Jesús ndive.

Upépe Pedro he’i Jesúspe: Mbo’ehára, iporã ite niko ikatúre roime ko’ápe. Torojapóna peẽme pene rendaguã, peteĩ ne mba’erã, peteĩ Moiséspe guarã ha Elíaspe guarã avei. Hemimbo’e kuéra niko oñemondýi ha Pedro ndoikuaái mba’épa he’íta.

Upévo ou peteĩ arai ha ojaho’i ichupekuéra. Ha pe araígui oñehendu peteĩ ñe’ẽ he’íva: “Kóva hína che Ra’y ahayhuetéva, pehendu ichupe.” Ha oma’ẽvo ijerére ndohechavéi avavépe hendive kuéra. Jesúspe añónte.

Oguejykuévo pe yvytýgui, Jesús he’i ichupe kuéra ani haguã omombe’u avavépe upe ohecha va’ekue, ha’e, yvypóraicha ou va’ekue, oikove jevy peve omanóva apytégui. Upévare oñongatu hikuái upéva ñemiháme, oporandu jepe ojupe mba’épa he’iséne upe jeikove jevy. Oporandu hikuái Jesúspe: Mba’ére piko umi Moisés rembiapoukapy mbo’eha he’i Elías ou raẽ va’erãha?

Ha’e he’i ichupe kuéra: Añete niko Elías raẽ ou va’erãha, ha ha’e omoĩmba porã va’erã opa ite mba’e hekópe. Ha mba’ére piko he’i Ñandejára Ñe’ẽ pe yvypóraicha ou va’ekue ohasa asy va’erã ha ojeapo’i va’erãha? Ha che ha’e peẽme Elías oúma hague ha ha’e kuéra ojapo hague hese ojaposéva, he’i háicha Tupã Ñandejára Ñe’ẽ, ojehúta hague ichupe.

Ñandejára Jesucristo Ñe’ẽ