LECTURAS DOMINGO V DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 43, 16-21

Péicha oñe’ẽ Ñandejára: Ku tape yguasu mbyte rupi ojapo va’ekue, ha tape po’i y pochy pa’ũ rupi. Ohatapyña osẽ haguã heta iterei ñorairõhára kárro ha kavaju reheve, ohundi haguã ichupekuéra.

Yvy rehe oity ichupekuéra, opu’ãve’ỹ haguã. Tataindy ogue vaicha opa hikuái. Ko’ágã Ñandejára he’i hetã guápe: “Ani pene mandu’a kuehe guare rehe, pejeheja yma guarégui.

Che ajapóta ipyahúva, agãitéma pehechata, oñepyrũma hína. Tape ajapóta yvy ojeiko’ỹháme ha ysyry yvy perõme. Che rerohory joáta tymba ñarõ, aguara’i ha ñandu guasu, y anohẽ hague rehe yvy ojeiko’ỹháme ha ysyry yvy perõme, amboy’u haguã che retãgua, che
rembiporavo, pe tetã ajapo va’ekue che rerohory haguã.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 125, 1-6
Opavave: Tuicha mba’e Ñandejára ojapo va’ekue ore rehe.

Ore Jára ore reraha jevy ramo guare Siónpe iñapytĩmby rojerereko haguégui tetã mombyrýpe,
ha’ete vaicha va’ekue ku ore képe rohecha ramo guáicha.
Upéma ramo ropuka reípa vy’águi ha rosapukái joa va’ekue. O.

Ambue tetã rupi oje’e ore rehe: “Tuichaite mba’e niko Ñandejára ojapo hesekuéra”.
Tuicha mba’e Ñandejára ojapo va’ekue ore rehe. Ha tuicha rovy’a va’ekue upe ramo. O.

¡Ore Jára! Eme’ẽ jevy oréve umi mba’eta roguereko va’ekue, ku ama omyenyhẽ háicha umi ysyry.

Umi tesaýpe oñemitỹ va’ekue vy’a pópe omono’õne ikoga’a. O.
Upe tesaýpe osẽva mba’e ra’ỹi ipo renyhẽ oñotỹ haguã
vy’a pópe ou jevýne koga’a apesã ipópe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Filipos guápe 3, 8-14

Che pehenguekuéra: Opa mba’e ikatu va’erã mo’ãva aguereko nda japói mba’eve ramo, ambojojáta ramo che Jára Cristo Jesús rehe.
Cristo rayhupápe aheja va’ekue opa mba’e, ha areko umíva yty ramo, arekóma guive ichupe che mba’erã, ha ajoaju hendive ndaha’éi tekojoja ahupity va’ekue tembiapoukapy apo rupi, Crísto rehe ajerovia rupínte, Ñandejára ohupityuka chéve pe tekojoja, ha’e ome’ẽva umi Crístope oguerohorývape. Aikuaase Crístope ha añanduse che pype upe pokatu osẽva ijeikove jeýgui, ha aikese umi jehasa asy ha’e ogueropu’aka va’ekuépe. Ajogua ramo ichupe iñemanóme, aha’arõ aikove jevýne haguã omanóva apytégui.

Nda’eséi ahupitymaha ko’ã mba’e ha aikomaha heko itépe. Aha hína tenonde gotyo jahecha nda hupytýipa. Cristo Jesús raẽ niko che rupyty va’ekue.

Che pehẽnguekuéra, nda’éi ahupitýma hague. Pe ajapóva katu, añembyesarái upe tapykuépe opytávagui ha añeha’ã ahupity pe che renondépe oĩva, aguahẽ haguã hu’ãme ha ahupity pe yvága Ñandejára ñane renoiha, jahupitýva Cristo Jesús rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Jl 2, 12-13

Ñandejára he’i kóicha: Peju jevy che ndive pende py’aite guive. Tupã niko ipy’a kyrỹi ha oporoporiahuvereko, ndaipochy kuaái.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 8, 1-11
Opavave: Romomba’e guasu ndéve, Ñandejára.

Upérõ Jesús osẽ oho Monte Olívospe. Ko’ẽmbávo, oho Tupaópe ha heta oĩ umi oñembojáva hendápe. Upémarõ oguapy ha oñepyrũ ombo’e chupekuéra.

Upe jave umi Moisés léi ombo’éva ha fariséo kuéra ogueraha hendápe peteĩ kuña ojejuhu va’ekue omyakãratĩrõ iménape. Omoñembo’y hikuái imbytépekuéra, ha he’i Jesúspe: — Mbo’ehára, ko kuña niko ojejuhu omyakãratĩha iménape. Moisés léipe niko he’i ãichagua kuña oñembo’ita va’erãha omano meve. Ndéiko mba’e ere.

Péicha niko ou oporandu hikuái Jesúspe ombopakova pireségui chupe hikuái. Ha upéi omoĩ vai haguã chupe poguasu kuéra renondépe. Jesús katu ojayvy ha ikuãme oñepyrũ ohai pe yvýre. Ha oporandu jey-jeýre chupe hikuái, oñakã rapu’ã ha he’i chupe kuéra: — Oime ramo pende apytépe ipecado’ỹva hína, upéva raẽve tojapi chupe itápe.

Upéi katu ojayvy ha oñepyrũ jey voi ohai pe yvýre. Ohendúvo hikuái upe Jesús he’i va’ekue, peteĩ-teĩ oñepyrũ ohopa hikuái, umi itujavéva tenondete.

Jesús opyta ha’eño pe kuña ndive, ha oñakã rapu’ã oporandu chupe:— Moõiko ohopa hikuái che áma. Ndaipóri véima piko nde jukaséva.
Pe kuña he’i chupe: — Nahániri karai.

Jesús he’i chupe upémarõ: — Che ave ndaipotái remano. Tereho, ha anivéma péicha rejapo.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.