MARTES SEMANA XXII TO

Ñahendúta Tupã Ñandejára Ñe’ẽ San Pablo ohai va’ekue Corintos guápe               2, 10b-16

Che pehẽngue kuéra:

Ko’ãva hína umi mba’e Tupã Ñandejára oikuaaukáva ñandéve Espíritu Santo rupi. Espíritu niko oipyguara opa mba’e, umi mba’e pypukuvéva Tupã Ñandejára rehegua jepe. Máva yvypóra piko oiméta oikuaáva mba’épa oĩ yvypóra py’apýpe, ndaha’éi ramo pe yvypóra espíritu oĩva yvypóra rekovépe? Upéicha avei, Tupã Espíritu mante ikatu oikuaa mba’épa oĩ Tupã rekovépe.

Ha ñandéve niko oñeme’ẽ va’ekue  Espíritu oúva Tupãgui, ndaha’éi ko yvýgui, jaikuaa porã haguã umi mba’e Tupã Ñandejára ome’ẽ va’ekue  ñandéve ipy’a porã rupi. Ñañe’ẽ ko’ã mba’ére, ñe’ẽ ñane mbo’e va’ekue  reheve Tupã Espíritu, ha ndaha’éi ñe’ẽ jaikuaa va’ekue  ñane arandu rupínte. Péicha ñamoesakã umi mba’e espíritu reheguáva, ñe’ẽ espíritu reheguáva reheve.

Umi oikuaa’ỹva espíritu reheguáva, ndoikuaaséi mba’eve Tupã Espíritu reheguávagui, ichupekuéra guarã výro reíva. Ha upéicha avei katu ndaikatúi oikuaa, umíva niko mba’e ojehecha va’erã espíritu reheguáva reheve mante. Ha pe oguerekóva upe Espíritu, ikatu ombojovake opa mba’e ha avave ndaikatúi ombojovake ichupe.

Ñandejára Ñe’ẽ niko he’i: “Ava piko oime oikuaáva Tupã Ñandejára apytu’ũ? Máva piko oheko mbo’éta ichupe.” Ñande jepe jareko Cristo apytu’ũ.

Tupã Ñandejára Ñe’ẽ.

SALMO ÑEMBOHOVÁI       144, 8-14

R. Tupä Ñandejára imba’e porã ha oporoporiahuvereko.

Tupä Ñandejára imba’e porã ha oporoporiahuvereko.

Ha’e oporohayhu ha hasýpe ipochy,

opavavépe ha’e ohecha kuaa,

ha ohecha ramo opa hembiapokue. R.

Opa ne rembiapokue ta ne momba’e guasu, Tupä Ñandejára,

opa nde rehe ojeroviáva ta ne momba’e guasu.

Ha’e kuéra to moerakuã tuichaha upe ne retã,

ha’e kuéra toikuaauka nde ne mbareteha. R.

Upéicha ramo maymáva oikuaáne

ne mbareteha, ha upe ne retã tuichaha.

Ne retã niko ndopáiva, ha nde reporosãmbyhýta opa árape.

Ñandejára nopyrũiva iñe’ẽre, ha’e ipy’a porã opa mba’épe. R.

Tupä Ñandejára nopyrũiva iñe’ẽre,

ha’e ipy’a porã opa mba’épe.

Tupä Ñandejára ojoko umi ho’ávape,

ikangývape omopu’ã jevy. R.

ALELUIA Lc 7, 16

Aleluia.

Peteï maranduhára tuicháva osë ñande apytépe

ha Tupä Ñandejára ou ohecha umi hese ojeroviávape.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       4, 31-37

Upe ramo Jesús oho Cafarnaúmpe, táva Galiléa peguápe, ha pytu’uha árape ombo’éva opavavépe. Ha opavave ohecha ramo mba’éichapa ha’e ombo’e ichupe kuéra. Ohechauka ku noikotevẽi ramo guáicha avavére he’i haguã mba’eve.

Pe judío kuéra tupaópe, oĩ peteï karia’y oguerekóva mba’epochy. Ha upéva hatã osapukái: Mba’ére piko reñemoĩ ore rehe, Jesús Nazaretgua? Reju piko ore rundívo? Che roikuaa.

Nde hína pe imarangatúva, Tupã Ñandejára omboúva.

Jesús oja’o pe espíritu añáme ha he’i ichupe: Ekirirĩ ha esẽ pe kuimba’égui!

Upépe pe mba’epochy oity yvýpe upe kuimba’épe, ha osẽ ichugui  ojapo’ỹre hese mba’eve ivaíva. Opavave oñemondýi, ha he’i joa ojupe: Mba’éichagua ñe’ẽ piko ãva? Oikuaa porãhápe ha pokatúpe ko kuimba’e he’i umi mba’epochýpe osẽ haguã, ha ha’e kuéra osẽ!

Ha oĩ Jesús rehe mandu’a opa rupi upe jerekuévo.

Ñandejára Jesucristo Ñe’ẽ