MARTES SEMANA XXX TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe                                         

        5, 21-33

Che pehẽnguekuéra:

Opavavéke pejapo oje’e háicha peẽme, pehechauka haguã pemomba’eha Tupä Ñandejárape.

Peẽ kuña omendáva, pejapóke pene ména he’íva peẽme, pejapo háicha Tupä Ñandejára he’íva peẽme. Ména kuéra niko tembireko akã hína, Cristo ha’e háicha pe iglésia akã. Cristo iglésia niko Cristo rete hína, ha ha’e katu ipysyrõhára. Ha pe Cristo iglésia ojapo háicha Cristo he’íva, tembireko kuéra avei ojapo va’erã iména kuéra he’íva ichupekuéra.

Peẽ ména kuéra, pehayhúke pene rembirekópe, Cristo ohayhu haguéicha pe ijiglésiape, ha ome’ẽ hese hekove. Péicha, ha’e omboyke pe ijiglésia Tupã Ñandejárape guarã, omopotĩ rire ýpe ha iñe’ẽ rupi, Cristo voi oguereko haguã henondépe peteĩ iglésia, porãgui ojajaipáva, imarã’ỹva ha icha’ẽ’ỹva ha mba’eve ãichagua oguereko’ỹva, imarangatúva uvei katu, ha mba’eve ivaíva oguereko’ỹva.

Péicha avei, ména kuéra ohayhu va’erã hembireko kuérape, ha’ekuéra ojehayhu háicha ijupe voi. Upe hembirekópe ohayhúva, ojehayhu ijupe voi. Avave niko ndojahéiri hetére. Ñamongaru uvei ha ñañangareko hese.

Péicha avei Cristo ojapo umi ijiglésiare, upéva Cristo retégui hína. Ha ñande niko upe hete rehegua. Ñandejára ñe’ẽme niko he’i:

“Upévare, kuimba’e oheja va’erã itúva ha isýpe, ha ojoaju hembireko ndive ha oiko mokõivégui peteĩ tekovénte.” Mba’e guasu ete ha ojekuaa’ỹva niko pe ko’ápe oje’éva, ha che añe’ẽ Cristo ha ijiglésiare. Opáichavo, ména kuéra to hayhu hembirekópe ojehayhu háicha ijupe voi, ha tembireko kuéra to momba’e iménape.

Tupã Ñandejára Ñe’ẽ.

SALMO ÑEMBOHOVÁI    127, 1-5

R. Revy’a va’erã Tupä Ñandejára rehe rejerovia ramo.

Revy’a va’erã Tupä Ñandejára rehe rejerovia ramo,

ha reiko ramo ha’e oipota háicha.

Nde ry’ái repykuégui rekarúne, revy’áne, ha opa mba’épe resẽ porãne. R.

Nde róga pýpe ne rembireko ojoguáta ku parral hi’a hetávape.

Ne mesa jerére katu nde ra’y ha nde rajykuéra

ojoguáta umi yvyra roky pyahúpe. R.

Kóicha ojehovasáta upe Tupä Ñandejára rehe ojeroviáva.

Tupä Ñandejára ta nde rovasa Sión guive reikove aja pukukue.

Reikovéta rehecha haguã mba’éichapa Jerusalén opu’ã. R.

ALELUIA Cf. Mt 11, 25

Aleluia.

Nde niko hovaspyre, ore Ru,  Tupä yvy ha yvága Jára,

hehechauka va’ekue mba’e guasu ete Sambyhy rehegua umi imichïvévape.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                    13, 18-21

Upe ramo Jesús he’i avei:

“Mba’épepa ojogua pe Tupã Ñandejára sãmbyhy ha mba’e rehépa ikatu ambojoja? Ojogua ku mostása ra’ỹime ojereraháva oñeñotỹ kokuépe, ha upéi opu’ã yvatéva yvyra mátaicha ha guyra ou ojaitypo hakãre.”

Jesús he’i avei: “Mba’e rehépa ikatu ambojoja pe Tupã Ñandejára sãmbyhy? Upéva ha’e ku mbuja mbovu háicha peteĩ kuñakarai ombojehe’áva 25 kílo rupi hu’itĩ, ipahápe ombovupáva.”

Ñandejára Jesucristo Ñe’ẽ.