Ñahendu Hesu. Martes 12ª Tiempo Durante el Año

Escucha el evangelio y la reflexión en: https://youtu.be/X1cDxMFAHhw

Martes 12º Durante el Año

Mateo 7, 6. 12 – 14

Upérõ Jesús he’i idisípulokuérape: Ani mo’ãke peme’ẽ umi mba’e imarangatúva jaguápe. Cháke ojeréne pende su’u vaipaite. Ha pene mba’e jegua ani peity kurépe. Opyrũmba reíne hese.

Upévare, pejapo pende rapicháre upe peẽ peipotaháicha ojejapo pende rehe. Upéva niko Ñandejára ñe’ẽ karaku hína.

Peike pe okẽ po’i rupi. Cháke tuicha hína upe okẽ ha ipe guasu upe tape ñande reraháva Aña retãme, ha heta umi upe rupi ohasáva. Upe okẽ ha upe tape ñande reraháva jaikovete haguãme katu ipo’i, ha ndahetái umi ojuhúva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Che jeýma he’i iñate’ỹva”. He’i ningo ñe’ẽ. Ha oikoséko upéva ñande rehe avei. Jaiporavóva ningo upe ndahasyivéva ñanerembiaporã ha jaheja jepi ipohýi kuete ambue ñande rapichápe guarã. Ja’use ningo upe hevéva, upe ojy porãvéva ha jaheja jepi hembyre, ipyrakue umi itapykuévape.

Japytase japytu’u ha jakeve mba’e ñapu’ãnte haguã upéi ha toñeme’ẽmba ñandéve, toĩmba ñane renondépe ambue oñeha’ã va’ekue ojapo ñandéve guarã. Péva oiméne hina upe tape ipe guasúva he’íva Hesu, heta ñande rapicha oguata hárupi, ndahasýi hárupi. Heta oime oikéva upérupi ha opoínte ijehegui.

He’i ningo ñe’ẽ: “Ajapóta jagua rembiapo, akarupa ha añeno ake.” Térã katu oje’e: “Ajapóta yryvu rembiapo, akarupa ha aveve aha.” Ndaipóri opytáva omopotĩ haguã ólla ha tembiporu, upéva ojehejáne tembiguái rembiaporã. Heta oikóva jagua ha yryvúicha, ijuru ha igústopente oñeme’ẽva ha ndojapóiva mba’eve ideprovéchova hapichápe.

Umícha guápe, he’i Hesu, ñañe’ẽ rei Tupã rehe, ñembo’e ha Tupao rehe, mbyky ojere haguã ñande rehe ñande su’u mba’e.

Hesu rapére oguatáva oipykúi hína tape po’i, hapicha rembiguáicha, ojapóvo hesekuéra upe oipota háicha ojejapo hese. Oheja upe iporãvéva hapichápe guarã.

Oma’ẽ hapicha remikotevẽre ha upéi oma’ẽ ijehe. He’i Hesu hetaveha umi oikéva upe okẽ guasu rupi, aña retãme ohóva, ha umi ojuhu ha oikéva okẽ po’i rupi katu hesa’i.

Hesu ningo pe ñande rayhu porãgui opunteáva ñandéve pe tape po’i, ha ñanembo’éva japorohayhu haguã avei ñande, ha’e ojapo haguéicha. Hese ñama’ẽvo mante ikatúne ñande avei jaike hendive upe okẽ rupi. Nane ño ha ñande jeheguínte ramo, jaikótante pe tape guasu rehe. Ndaiparáda porã mo’ãinte ko hína ñandéve amo ipahápe.

Mba’etépa he’ise nde rekovépe hína che reindy ha nde che irũ pe “tape guasu” ha pe “tape po’i”. Mba’eichaitépa oiméne reguatáma voi upérupi reikóvo.

Pa’i Alberto Luna.