Ñahendu Hesu. Miércoles 12ª Tiempo Durante el Año

Escucha el evangelio y la reflexión en: https://youtu.be/kW2Pz_drd2w

Miércoles 12º Durante el Año

Mateo 7, 15 – 20

Jesús he’i hemimbo’ekuérape: Pejesarekóke umi proféta japúre. Cháke oúne pene rendápe ku ovecháicha, ikorasõme katu aguara guasu ñarõ. Hembiapóre peikuaáta. Jaipo’óva nga’u piko arasa’a jukeri mátagui, térã aratiku juasy’y mátagui. Nahániri. Ha péicha, yvyra máta porã, hi’a porã. Yvyra máta vai katu, nahániri.

Ndikatúi niko yvyra porã hi’a vaívo, térã yvyra vai hi’a porãvo. Umi yvyra hi’a porã’ỹva niko ojeity ha ojehapy. Ha péicha, hembiapóre peẽ peikuaáta mávapa hína umi ijapúva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe mbói jahecha ramo ñande rapépe ningo mombyry jajere ichugui, ha ikatu ramo jajuka voi ani haguã ñande su’u mba’e. Jaikuaa hína ñande su’u mba’e ramo ñanembohasytaha nañandejukaitéi ramo voi.

Oime ningo umi mba’e vai voi jahechakuaáva ha ikatúva jajehekýi ichugui oike mboyve ñande korapýpe, ñande rekovépe. Ha oime avei aña rymba oñembojeguáva iporãite ramo guáicha ñanembotavy haguã. Upéva hina upe he’íva Hesu aguara guasu oñemondéva ovecha pirépe, oñemboja haguã ñande rehe imansoite ramo guáicha.

Ñanemoñe’ẽmba ha ñanembojuru he’ẽ, Ñandejára ha Tupãsy jepe ohenóita hína ñanembotavy haguã. Ijapénte hína upe morotĩ ha hu’ũ asýva ha ipype katu hãi puku
raimbe ñande trosa paite haguã.

Umívape jaikuaáta hembiapokue ha hapykuerére. Ndaha’éi ijapére térã katu iñe’ẽre año jaikuaáva ñande rapicha. Ñe’ẽ ningo ikatúnte ja’e, japoi yvytúre, ndahasykuéi ja’e mba’e porã, yvága jepe ñahenói. Upéi ñamoañete haguã tembiapópe katu ótro pítopúma hina. Ha upépe ojekuaa añetépa upe ja’éva térãpa japu.

Peñeñangarekóke he’i Hesu. Jajapysaka ha ñama’ẽ. Cháke ovecha pire guýpe ikatu hína okañy jaguarete ñarõ. Ha ñanembotavy jepe ramo katu jaikuaáma haguã anive ja’a jevy ipo guýpe.

Jahecha haguã peteĩ mba’e iporãpa añete, ñama’ẽ ha jajesareko va’erã mba’éichapa oñepyrũ, mba’éichapa oho hese tapére ha upéi mamópa oguahẽ. Ha oime ramo oñepyrũ porã, oñemosã porã ohóvo ha ipahápe ave iporã ramo, upéva señal porã hína.

Tapére reñandu ramo che reindy ha nde che irũ nde reraha vaitaha katu, epilláma hína mávapa omoinge huguái. Ejehekýintema ichugui ikatu aja, ivaipaite mboyve.

Pa’i Alberto Luna.