Ñahendu Jesús Ñe’ẽ. Martes 3º de Paskua

Escucha el evangelio y la reflexión en: https://youtu.be/DT33tnwmV54

MARTES 3º PÁSKUA

San Juan 6, 30 – 35

Upérõ oime osẽva oporandu Jesúspe: — Mba’e milágro piko rejapóta roguerovia haguã umi mba’e eréva. Ehechauka oréve. Ore ru kuéra ypykue niko ho’u va’ekue mana desiértope.

Ñandejára Ñe’ẽme niko he’i: “Yvágagui omboguejy chupekuéra pan ho’u haguã”.

Jesús katu he’i chupe kuéra: — Ha’éta peẽme peteĩ mba’e. Ndaha’éi Moisés upe ome’ẽ va’ekue peẽme pan yvagapegua. Che Ru hína upe ome’ẽva peẽme pan yvagapegua. Upe pan
che Ru ome’ẽva niko hína pe oguejýva yvágagui ha omoingove opavavépe.

Ha’ekuéra he’i chupe: — Karai, eme’ẽmona oréve upéva upe pan ára ko’ẽre.

Jesús he’i chupekuéra: — Che niko hína upe pan oporomoingovéva. Upe che rendápe oúva naiñembyahýi chéne araka’eve. Ha upe che rehe ojeroviáva, nda’ijyuhéi mo’ãi araka’eve.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Mba’épa oime, mba’éichapa peiko… Ha mba’eve guasu, jepi guáicha. Silencio, sin noveda… Péicha ku ja’éva jajotopa ramo ñane irũ nguéra ndive. Ha péicha añete jahasa ára ko’ẽre.

Ha’ete voi ndaipóri guasúiva ipyahu etereíva, peteĩ ára ojogua pe ohasa va’ekuépe ha upe kuehe jajapóva jajapo jeýnte ko’ẽro ha ko’ẽ ambuérõ.

Oiméne ko upévare jahechase terei ipyahúva, hechapyrãva, milágro ojajaipáva, hendy ha oguéva. Ha upéicha avei jahecha ou umi Hesu vallegua ojerure chupe ojapo haguã mba’e hechapyrãva ojerovia haguã hese. Hesu katu ñanembo’e pe jerovia añete noñembohapói milágro ha mba’e hechapyrãva rehe.

Hesu niko ñandéichaiténte avei oiko, ndaha’éi ku ojajaipáva mba’e peteĩ ánhel ramo guáicha. Pe jerovia añete ha’e ojeruréva ñandéve ha’e hína jarovia Ñandejára oĩha ipype ndajahechái ramo jepe mba’eve guasu overapáva ijehe. Ha upéicha avei pe tembi’u marangatu Hesu ome’ẽva ñandéve mísa hápe, eucaristía pe. Peteĩ pan mi pehengue rupive Hesu ñane mongaru, ñanemopeteĩ hendive.

Ñande avei ñamboja’o haguã ñande rapicha kuéra ndive ñane rembi’u ha jarekomíva. Ko Paskua jave niko ñande iglésia ñane mbo’e iporã ñañemombe’u ha ñakomulga.

Ñañembojami Ñandejára támbore, ñañembovevúi, ñañepohano, ha jahupi pu’aka. Ha ndaikatúi vove jaha mísa hápe ñakomulga, ñañemboja jakaru Hesu ndive, ikatu jajapo comunión espiritual, ja’évo Hesúpe ñande rógape, ñane ñembo’épe: “Ñandejára Hesukrísto
aipota reju che rendápe, ndaikatúiramo jepe aha che ne rendápe, aikuaa Nde ikatuha reju.

Aikotevẽ nde rehe. Aipota che perdonami ha che rovasa, ehovasa che rekove, che rete, che
rembiapo, ehovasa che róga ha opa che rogagua. Epytákena chendive, ani che reja, ani epoi che hegui araka’eve. Amén”.

Pa’i Alberto Luna.