Ñahendu Hesu Ñe’ẽ. Miércoles III de Pascua

Escucha el evangelio y la reflexión en: https://youtu.be/-QhQrXmFxmY

MIÉRCOLES III DE PASCUA

San Juan 6, 35 – 40

Upérõ Jesús he’i umi héntekuérape: — Che niko hína upe pan oporomoingovéva. Upe che rendápe oúva na’iñembyahýi chéne araka’eve. Ha upe che rehe ojeroviáva, nda’ijyuhéi mo’ãi araka’eve. Opáichavo, ha’éma voi kuri peẽme ndapejeroviaiha che rehe pehecha ramo
jepe umi mba’e ajapóva. Opa umi che Ru ome’ẽva chéve, ou che rendápe.

Ha umi che rendápe oguãhẽvape che namosẽ mo’ãi. Che niko ndajúi ko yvy ári ajapo haguã umi mba’e che ajaposévante. Nahániri. Aju katu ajapo haguã che Ru, pe che mbou vaekue, oipotáva.

Ha che Ru, pe che mbou vaekue oipotáva niko kóva, ani oñehundítei chehegui avave umi ha’e ome’ẽvagui chéve. Amopu’ã jey vaerã katu chupekuéra ágã ára pahápe. Che Ru rembipota niko kóva hína. Opa umi chéve che recháva tojerovia che rehe oguereko haguã
jeikove opave’ỹva. Upéicharõ ágã ára pahápe, che amopu’ã jeýne chupekuéra.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jajepy’apy niko ñane rembi’urãre, ani haguã ñaneñembyahýi, avei ñane angekói ñande aóre, óga, tesãi ha hetave mba’ére ñamboguata porã haguã ñande rekove ára ko’ẽre, ha umíva rapykuéri jaiko ñañeha’ã jaju ha jaha, sapy’ánte ñaneresasẽ ha ñande py’a ropu.

Jaheka avei ñande vy’arã, ñambovevúi haguã ñande rekove ha ñande resarái haguã jehasa asýgui, japytu’usemi ningo avei ha ñañembopiro’yse. Ha ikatu sapy’ánte ñañandu pya’e ohasaha umi mba’e ha ndopytái vaicha ñande pype mba’eve. Pe tembi’u omyenyhẽ ñande rye ha agãite ramo guarã ñane ñembyahýi jeýma, upéicha avei jay’u heta ramo jepe, agãite ha ñande yuhéi jeýma.

Hesu he’i jaháramo hendápe jajuhutaha ñanemyenyhẽ ha ñanembovy’a aréva. Pe py’aguapy jahekáva ha jaipotaitéva ha’e oreko, he’i, ha ome’ẽse voi katu ñandéve. Ha jaha ramo hendápe ha’e nañanemosẽ mo’ãi, he’i. Ha’e ndoipotáigui oñehundi chugui avavete, oñeha’ãta ñande rehe, ha ñanerenohẽta javorái kuágui, ñanemopu’ãne ja’a hágui, ha ñanemoingove jevýne ñamano ramo jepe.

Reñandúpa che irũ, ha nde che reindy, upe Hesu ome’ẽva ndéve opyta pypukuha ne ánga ruguápe. Ha pe Ñandejára grásia rehupytýva Hesu rupive ndoguéi péicha péichante nde py’águi, opyta mbarete nde pype ha ñanemboguata mombyryve.

Pa’i Alberto Luna.