Ñahendu Hesu Ñe’ê. Jueves III de Pascua

Escucha el evangelio y la reflexión en:

JUEVES III DE PASCUA

San Juan 6, 44 – 51

Upérõ Jesús he’i umi héntekuérape: Avave niko ndoúiri che rendápe ndoguerúi ramo
chupe che Ru, pe che mbou vaekue. Ha oĩ ramo oúva, che amopu’ã jeýne chupe ára pahápe.

Profétakuéra kuatiápe niko he’i: “Ñandejára oheko mbo’éta opavavépe.” Aipóramo, oĩ
ramo ohendúva che Rúpe ha ohejáva ha’e ohekombo’e chupe, umíva oúne che rendápe.

Kóva nde’iséi oĩha ohecháva che Rúpe. Nahániri. Chénte, upe Tupãgui voi ajúva, pe ahecha va’ekue chupe, ha ndaipóri avave. Añetéko ha’e hína peẽme. Pe ojeroviáva che rehe oikovéta opa ára guarã. Che niko hína pe pan oporomoingovéva. Pende ru kuéra ypykue niko ho’u vaekue mana pe desiértope, ha omano jeýnte va’ekue hikuái.

Che niko añe’ẽ hína peẽme ku pan rehe oguejýva yvágagui. Maymáva ho’úva upéva nomanói chéne. Che niko pe pan oporomoingovéva, oguejýva yvágagui. Upéva pe pan ho’úva oikovéta opa ára guarã.

Pe pan che ame’ẽtava peẽme niko che rete voi hína. Ha che ame’ẽta opavave rehehápe,
oikove haguã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Tupao, capilla, grupo ha movimiénto hápe ijaty la hénte. Oime niko obispo, pa’i,
hermana, animador, coordinadora, ojeguerohorýva, ombyaty ha omomyikuaáva hetápe,
omosã ha omboguatáva mitã, huventu ha tuja. Ha ñande ja’e huláno ivale, ika’avo,
ojehayhu.

Hesu katu he’i umi oúva hendápe ndoúi ijehegui reínte, térã katu ha’e ika’avo
haguére, he’i ouha Túva Ñandejára ohekombo’égui chupe kuéra. Ñandejára ha’e upe oisãmbyhýva ha ombo’éva opavavépe, ha’e hina upe omohendáva peteĩ teĩme, oñeñandukáva ipy’apýpe, oñatõi ha ohenóiva umi ojeroviávape ijaty haguã ohendu iñe’ẽ, oñembo’e, omba’apo comunidápe oñondive, Hesu rayhupápe.

Upéva he’ise hina cristiano rembiapo tupaópe oñemomýiva ndaha’éi hulaníto rembiapo, ña ma’ẽra mba’e, pa’i térã hermana rembiapo. Hesu he’i ñande ndaha’éi ñamosãva avave Ñandejára korapýpe, ñande ha’e tembijokuáinte. Túva Ñandejára ha’e upe mba’e jára omboúva komunidápe ñande rapicha. Naiporãi aipóramo avave oñembojára avavére Ñandejára rérape, térã oimo’ã heta ombyaty ramo ha’e ijehegui péva ojapoha.

Ñandejára ome’ẽgui chupe katu ojapo, hérape oisãmbyhy va’erã ha ipahápe ichupe jey
ome’ẽ va’erã.

Ha ndépa che irũ ha che reindy, reñandu upe Hesu he’íva: Túva Ñandejára neatõi
ramo ha nerenói eñemboja haguã Hesúre. Mba’éichapa nde reñandu hína umíva oiko nde
rekovépe, ha mba’épa Túva Ñandejára oime nekonvida hína rejapo haguã.

Pa’i Alberto Luna.