Ñahendu Jesús Ñe’ẽ. Viernes 3º Pascua

Escucha el evangelio y la reflexión en: https://youtu.be/D16Wa0YJGYY

VIERNES 3º PASCUA San Juan 6, 51 – 59

Upérõ Jesús he’i umi héntekuérape: Che niko pe pan oporomoingovéva, oguejýva yvágagui. Upéva pe pan ho’úva oikovéta opa ára guarã. Pe pan che ame’ẽtava peẽme niko che rete voi hína. Ha che ame’ẽta opavave rehehápe, oikove haguã.

Kóva ombopochy umi judíokuérape, ha he’i hikuái ojupe: — Mba’éicha piko aipo hete ho’ukáta ñandéve.

Jesús he’i chupekuéra: — Añetéko ha’e peẽme, ndape’úi ramo Ñandejára ra’y rete ha ndapey’úi ramo huguykue, ndapeikove mo’ãi. Pe ho’úva che rete ha che ruguy oikovéta opa ára guarã, ha che amopu’ã jeýta chupe ára pahápe.

Che rete ha che ruguy niko hína hi’upy añetetéva. Che rete ha che ruguy ho’úva, peteĩnte chendive, ha che peteĩnte hendive.

Che Ru, che mbou vaekue, niko oikove ha ha’e rupi che aikove. Péicha avei, upe che retégui ho’úva, oikovéta che rupi. Añe’ẽ niko hína peẽme upe pan yvágagui oguejy va’ekue.

Upéva ndaha’éi ku manáicha pende rukuéra ypykue ho’u va’ekue ha upéi omano. Nahániri.

Pe ho’úva kóva ko pan, oikovéta opa ára guarã. Jesús ombo’e vaekue ko’ã mba’e Cafarnaum tupaópe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jajapo ramo peteĩ karu guasu, ñane sánto árape, térã oiko ramo menda, mitã karai mba’e, upépe ñakonvida umi ñande reheguáva, umi jahayhúva, jajepokuaaha. Ha javy’a ou ramo oime ñane ndive, ñande guerohory ha ohechauka ñande apoha mba’éramo.

Upéva ñanembojoaju mbareteve ha omongakuaa mborayhu.

Jesús hi’ára pahape ombyaty iñirũ ijerekuévo. Umi ohayhúva ha oikóva hendive opa ára okaru haguã hendive pe Pascua pyharépe. Upépe Jesús ohovasávo pe pan, omboja’o ha ome’ẽ chupe kuéra ha he’i péva pe pan ha’eha hete oñeme’ẽva omano haguã ñane rendaguépe. Ha ho’u hikuái hendive pe pan, ha Jesús he’i ojapo vaerãha hikuái péva imandu’a haguã hese opa ára.

Pe mísa hápe ñande jajapo upe Jesús he’i va’ekue jajapo va’erãha hérape. Jakarúvo hendive pe comunión-pe ha’e ñanemoirũ ha ñanemopeteĩ hendive.

Jesús he’i jakaru ramo hendive jareko tekove añete Ñandejáragui oúva, tekove opa’ỹva. Ñaime gueteri ningo hína Pascua-pe ha oime hína Jesús nera’arõ gueteri avei che reindy ha ndéve che irũ, ome’ẽ haguã ndéve pe tembi’u añete, ha’éva hete. Akóinte ko oime ha’e nera’arõ. Eguahẽ vovénte.

Pa’i Alberto Luna.