Ñahendu Hesu. Miércoles Semana 15a TO

Escucha el evangelio y la reflexión en: https://youtu.be/wOVwSWrDsvg

Miércoles Semana 15^a TO                                        

          Mateo 11, 25 – 27.

   Upérõ Jesús he’i: Che Ru, nde pópe niko oĩ yvága ha yvy. Romomba’e guasu reñomi haguére ko’ã mba’e umi iñarandu ha imba’e kuaávagui, ha reikuaauka haguére umi iñarandu’ỹvape.  Upéicha che Ru, péichante voi reipota vaekue ojehu.

       Che Ru niko omoĩ opa mba’e che pópe. Avave ndoikuaái Ñandejára Ra’ýpe, Túva añónte. Ha avave ndoikuaái Túvape, Ñandejára Ra’y añónte, ha umi che  aikuaaukasévape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Che rapicha tavy cheichaguávante piko mba’e che mbo’éta. He’i lo mitã. Tekotevẽ ou karai arandu, imba’ekuaáva ñahendu haguã ichupe. Umi ilivro guasúva, oho vaekue universidad-pe, itítulova, ikatúva omombe’u ñandéve ipyahúva, jaikuaa’ỹva, ideprovechomíva. Upe ñandéicha guáva ningo jaikuaáva voínte he’i jevýta ñandéve, naikuénta mo’ãi mba’everã. Upéicha ningo oje’e jepi.

            Ápe ñahendu Hesu oguerohory Tupãme oñeñanduka haguére umi imirĩvape, umi itavymígui oñemboykévape, ndaha’éi umi imba’ekuaa, karai guasu iñarandúvape. Ha he’i itúva yvága pegua péichante voi oipota raka’e ojehu. Ñandejára noñandúi aipóramo ñande jakarkula háicha ha lo mitã opensa háicha.

            Ha oiméramo Ñandejára ojekuaauka ha oñeñanduka umi ñande rapicha michĩvévape,  tekotevẽ ñande ñañemoaiguĩve ichugui kuéra. Umíva ikatu heta mba’e ñanembo’e jajeroviave haguã Ñandejárare. Ha’e kuérata hína aipóramo la ñande maéstro ko Ñandejaŕa rapére, asegún ko Hesu he’íva. Ha’e kuéra niko añete ikatu ñanembo’e ndaha’eiha hetaiterei mba’e ñaikotevẽva, jaikokuaa vaerã ningo, javy’akuaa  ñeikotevẽ pa’ũme jepe. Ikatu ñanembo’e mba’éichapa jajerovia vaerã Ñandejárare, jakaru, ñañemonde ha ñaneresãi haguã. Ñanembo’e ani haguã jajerovia iterei pláta ha arandu rehe. Mboriahu niko omboja’o kuaave upe orekomíva ha  ñanembo’e ani haguã ñane chi’õ ha ñanerakate’ỹ eterei.

            Ndareíri niko obispo católico kuéra América Latina gua, ijaty vove, he’i jevy jevy ñandéve ha ñande Iglesia pe tekotevehã ñamotenonde ha ñambojerovia umi imboriahuvévape. Péva hína upe oñehenóiva: “Opción preferencial por los pobres”.

            Ha ndépa che irũ ha che reindy, mba’e rehecha. Mba’épa ikatu nembo’e umi mboriahu. Ha mba’éichapa nde ikatúne eñemboja, eñemongeta ha eguata hendive kuéra, Hesu ojapo ha ñanembo’e haguéicha.

Pa’i Alberto Luna.