Ñahendu Jesús Ñe’ẽ. Martes 15º Durante el Año

Escucha el evangelio y la reflexión en: https://youtu.be/ssr0FgmAq2o

Martes 15º Durante el Año Mateo 11, 20 – 24.

Heta milágro niko Jesús ojapo umi pueblo oikoha rupi. Upéicharõ jepe umi upepegua ndohejái ipekádo. Ha Jesús ipochy ha he’i: Pejererekóke peẽ Corazíngua. Pejererekóke peẽ Betsaidagua. Tíro ha Sidónpe mba’e ajapo rire umi milágro ajapo vaekue pende apytépe, ymáma ojerepa va’erã mo’ã hikuái Ñandejárape.

Omonde vaerã mo’ã hikuái ao vosakue ha omombo tanimbu iñakã ári, ohechauka haguã oñembyasyha. Upévare ha’e peẽme, ágã ára pahápe, peẽ pehasa asyvéta hína umi Tíro ha Sidón peguágui. Ha peẽ Cafarnaumgua, peimo’ã piko peguãhẽtaha yvágape. Nahániri.

Ñandejára pene mondóta Aña retãme. Sodómape mba’e ajapo rire umi milágro ajapo va’ekue pende apytépe, oikove vaerã mo’ã gueteri hikuái ko’agãite peve. Upévare ha’e peẽme, ágã ára pahápe, peẽ pehasa vaivéta umi Sodoma peguágui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime ningo opureáva ha ojejapóva ikatóliko iterei haguére. Ojapopa haguére tupao gua sacramento, catecismo, ñembo’e, hamba’e. Térã katu pa’i oho haguére hógape, obispo ohovasa haguére ichupe, oho haguére Caacupépe, el Papa rendápema katu oime ohóva, opa Roma jepe oguahẽ onohe foto ha opurea upévare. Ha ikatu voi jajerovia umíva rehe ha ñañepyrũma ñañemoĩse ñande rapicha ndojapóiva ha ndohupytýiva umíva ári.

Jesús ohecha péicha avei ojapoha hese umi ivallegua, ou opurea gua’u ohecha, ohendu ha opoko haguére hese hamba’e.

Ha ndogustái Jesús pe péicha, ha oja’o voi umi ojejapóvape ohendu ha ohecha haguére ichupe. Ndaha’éi katuete jaikuaave haguére Ñandejáraguigua. Térã jaguata haguére comunidad pe ikatuha jajerovia jahupytýtamaha Ñandejára jehovasa ha jaiketaha katuete yvágape, ñane tenondétaha ñande rapichágui. Ikatu hína umi hekove vaíva ndoikuaáiguinte péicha oiko, ha ñande jaikuaáva katu ndajajapopái hekópe.

Ha’ekuéra oikuaa rire umi mba’e ñande jaikuaáva, ohasa rire umi mba’e ñande jahasáva, ha oreko rire umi mba’e ñande jarekóva, ymáma ñande rasa vaerã mo’ã tembiapo porãme. Ikyre’ỹve vaerã mo’ã ñande hegui Ñandejára rapére. Ha upéicha, ñaimo’ã’ỹre upéinte ikatu ou ha’ekuéra opuntea ñandehegui. Ikatu hína umíva Ñandejára omoĩ ñane renonderã.

Aníke upéicha, he’i Jesús, ñaimo’ã ñaimemaha ñane rendaguãme, jajeroviaiterei ñande jehe ha jaguapytaha voi amo yvága ru’ãme. Ñande rekovépe ningo ojekuaa va’erã tekove pyahu, tapicha rayhu ha mba’e porã. Anínte ágã, che reindy ha nde che irũ, ou amo ipahápe oiko ñande rehe ku Jesús he’i vaekue: Umi ojejapo ha oñemotenondéva Ñandejára ombotapykuéta, ha umi oñembotapykuéva hapicha rayhupápe katu Ñandejára omotenondéta.

Pa’i Alberto Luna.