Ñahendu Hesu Ñe’ê. Domingo 22 de diciembre

Escucha el evangelio y la reflexión en: https://youtu.be/VE5rfL7otCs

DOMINGO 4° de Adviento Ciclo A Mateo 1, 18-24.

Jesucristo oúramo guare kóicha vaekue: Isy María ome’ẽma iñe’ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijohei pyréva, nomoherakuã vaiséi chupe. Oheja reise mo’ãnte chupe, avave oikuaa’ỹre.

Ko’ã mba’e ombojere aja iñakãme, ojehechauka chupe iképe peteĩ Ángel, ha he’i chupe: José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou. María imembýta ha rembohérata pe mitã Jesús. Ha’e hína osalváta tetã Israel.

Ko’ã mba’e ojehu oiko haguã hekoitépe upe Ñandejára he’iva’ekue proféta rupi:
“Kuñataĩ imarã’ỹva hye guasúta ha imemby kuimba’éta. Oñembohérata Emanuel,
he’iséva “Tupã oĩ ñane ndive”.

José opáyvo, ojapo pe Ángel he’i haguéicha chupe, ha ogueraha María hógape
hembirekorã.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Peteĩ tembiapo guasu ñamoñepyrũta ramo, ha jaiporavóta ramo omyakãva ñandéve aty guasu, jaheka jepi umi iñarandumíva, ykatupyryvéva, omýi kuaáva siudáre, oñe’ẽ kuaáva karai guasu kuéra ndive, jajepokãve jepi kuimba’e otyarõmava, ikarai guasúva rehe. Ndajajerovia guasúi mitã pyahúre, mitãkuña rehe, ha ilápi mbykymíva rehe.

Ha jahecha Ñandejára ombohape vove Hesu jeju, ndaha’éi ñandéicha oñandúva.
Ha’e ndoiporavói kuimba’e otyarõva, oho oiporavo peteĩ mitãkuña pyahu, oikóva peteĩ
pueblo’ípe, imboriahúva; ha’e ndoiporavói iñarandúva, ikatupyrýva, oho ojeporeka
peteĩ kuñamíre ndohóiva ekuélape ha ichupe ohenói.

Ñande Obispo kuéra América Latinagua niko yma guivéma oiko he’i cristianokuéra ñande Iglésiape ñamotenonde vaerãha opa mba’épe umi imboriahúva, upéva ha’e hina pe “opción preferencial por los pobres” oje’éva. Ha ñanembo’e avei ñamotenonde ha ñañangareko vaerãha umi mitãkuña ha mitãkuimba’e pyahúpe, “opción preferencial por los jóvenes”, oje’éva. Ha péva ningo ñande obispo kuéra he’i jevy jevy ñandéve

heta kuatiápe 1978 guive amoite Puebla, Méxicope, upéi Santo Domingo República
Dominicánape, ha ipahápe 2007pe he’i jevy ñandéve Aparecida, Brasílpe:
Ñamotenonde va’erã opa mba’épe imboriahúva, mitãkuña ha mitãkuimba’e pyahu.
Ha ekarkulamína che irũ ha nde che reindy upe Ñandejára ojapóva oiporavóramo guaré Maríape, ha’éva peteĩ mitãkuña pyahu mboriahu, mávarepa hesaho ha omotenonde. Mba’eichaitépa ñande avei ikatúne José icha, ohayhu ha oiporavóva Maríape, opytáva ijykére ha oñangarekóva hese ha imembýre, ndopoíriva ichugui, noñembotavýi ha ndoheja reíriva hapicha kuña mboriahu.

Pa’i Jasy.