Ñahendu Hesu Ñe’ê. Sábado 21 de diciembre

Escucha el evangelio y la reflexión en: https://youtu.be/NAugzVpxvWc

21 de diciembre. Feria de Adviento Lucas 1, 39-45

Umíva umi árape, pya’ete María osẽ oho peteĩ puéblope opytáva sérro pa’ũme Judápe.
Oikévo Zacarías rógape, omomaitei Isabélpe. 4 Ha ohendúvo María maitei, Isabel oñandu mba’éichapa pe mitã omýi hyépe. Upépe, Isabel henyhẽ Espíritu Sántogui. Ha osẽ he’i Maríape: — Ñandejára niko nde rovasave ndéve opa kuña apytégui. Ha ohovasa ne memby ave. Máva piko che, nde Ñandejára sy, reju haguã che rendápe. Ahendúvo nde che omaiteívo, che memby omýi vy’águi che ryépe. Ñandejára nde rovasa rerovia haguére oikotaha umi mba’e ha’e he’i va’ekue ndéve.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Opavave ñande niko ñane reñói peteĩ kuña ryépe, upéva ha’e hina ñande sy, ñande reraha va’ekue ipy’ápe oja guive ñande rekove hyepýpe, oñemopeteĩ rupi ñande rúndive, upévare ikatu ja’e ñande ha’eha mborayhu reñoingue.

Tuicha mba’e upe ñande sy, ñandereraha va’ekue ipype, ñanemongaru va’ekue hete ha huguýre, ñanemoñe’ẽ ha ñande apichýva hyepýpe, ñanera’arõ ha oñembo’éva ñanderehe ñaguahẽ porãite haguã arapýpe ñande jaikuaa mboyve.

Pe mitã isy ryépe niko oñandu, omýi, opo, ovy’a térã ikangy. Upévare ñande ypykue guaraní hakate’ỹ va’ekue kuña hyeguasúva rehe ani haguã ojeharu imemby, oikuaa hikuái pe sy iñangekói ramo pe mitã hyépe oĩva ohasa asýtaha avei. Tuicha mba’e upe tekove heñóiva pe kuña ryepýpe, tuichaiterei mba’e ijypyete guive tekotevẽva jahecha ramo, jahayhu, ñanerakate’ỹ ha ñadefende ani haguã oñembyai, ani haguã ojeity, ani haguã ojehapo’o.

Sy ha túva ojejokuái hina omoguahẽ ha oñangareko haguã pe familia Ñandejára ome’ẽva chupekuéra, péva ha’e tembiapoukapy, misión, tembiaporã, Ñandejára ome’ẽva sy ha túvape oñomoirũ va’erãva pe mitã rekombo’épe.

Jahechamína che irü ha nde che reindy, mba’épa ikatúne ñande jajapo ko Navida rapére jahávo ñamoirü haguä kuña hye guasúva, ojapo haguéicha María ohóvo Isabel rendápe. Mba’épa ikatúne jajapo mitä michïva rehe, opo haguä vy’águi hikuái, ñande rógape voi, ñande vesíno, ñane hénte kuéra apytépe, ha ñande komunidápe.

Pa’i Jasy.