Ñahendu Jesús Ñe’ẽ. Domingo 23º Durante el Año

Escucha el evangelio y la reflexión en: https://youtu.be/NjyyOvPSoM0?feature=shared

Domingo 23º Durante el Año Ciclo C. Lucas 14, 25 –33.

Upérõ heta umi ohóva oikóvo Jesús ndive mamo ohoha rupi. Upéma ramo he’i chupekuéra: Peikosérõ che disípulo ramo, che rayhuve vaerã chéve pende rúgui, pende sýgui, pene rembirekógui, ha opa pene família kuéragui. Ndaikatúi peiko che disípulo ramo pene rakate’ỹ ramo pende rekovére. Na peiméi ramo pehupi haguã pende kurusu ha che moirũ, ndaikatúi peiko che disípulo ramo.

Ja’éntena pemopu’ãseha peteĩ tórre. Mba’e pejapo raẽ. Peguapy pehecha mbovýpa pende rupytýta peikuaa haguã perekópa hepyrã. Peicha’ỹrõ, peñepyrũ kuaa pemopu’ã ha ágã upéi tape ku’a rupi peso. Ha upéi ojepukapa pende rehe. Osẽne he’i hikuái, “Ajépako nde výro. Reñepyrũ ha ndaikatúi ejapopa”.

Ha mba’épa ojapóne peteĩ rréi 10 mil soldádonte oguerekóva ha osẽséva oñorãirõ 20 mil oguerekóva ndive ha oúva hína hi’ári. Ohecha raẽta ikatúnepa ipu’aka pe oguerekóva reheve. Ha ohecha kuaávo ndai’ipu’aka mo’ãiha hapicháre, mombyrymi guive omondóne hendápe hembijokuái oñomongeta anivéma haguã oiko vai.

Upévare ha’e peẽme, peikosérõ che disípulo ramo, pehejapa va’erã opa mba’e perekóva.

Ñandejára Jesucristo Ñe’ẽ.

ÑAMBOGUEJYMI ÑANDE REKOVÉPE…

Ñande ru ha ñande sy, ñane hermanokuéra, ningo ñane pehengue. Tuicha mba’e hína upe ñande ruguy, ndaha’éi yrei. Ñanemosã ha ñane apytĩ mbaretéva rehegua hína upe ñanereñói ha jakakuaa hague. Ha ñahendu Jesús he’i jahayhuve va’erãha ichupe ñande ru, ñande sy, ñane irũ, ñande socio kuéragui. Upéicha mante ikatúta ñamoirũ ichupe. Ijetu’u eterei vaicha upéva, aje.

Jajeroviávo Jesús rehe niko jaike peteĩ tekove pyahúpe, Ñandejáragui oúva. Jaike jey escuela-pe. Ñañehehekombo’e jey jaguata haguã peteĩ tape iñambuéva pe ñande sy, ñande ru ha ñande kakuaa irũngue ndive jaikuaa ypy vaekue. Péva hína Espíritu Santo arandu, ndaha’éiva ko mundo rehegua arandu.

Ñamopu’ãramo guáicha peteĩ óga guasu ipyahúva ha jaheja upe oga tuja jaiko ypy hague. Ñama’ẽnte vaerã -he’i Jesús- jajedesidi porãpa ha ñaimépa añete ñamohu’ã haguãicha ko tembiapo. Ani ágã ñamoñepyrũ ha japyta tapére, jaju jey ñande paguíchi tujápe ha opytapa rei upe ñamoñepyrũ va’ekue ha ojepukapa ñande rehe.

Ñandejára ome’ẽ ñandéve ñane akã jakarkula ha jaiporavokuaa haguã iporãvéva, ho’avéva ñande rehe ha ikatútava jagueropu’aka. Ani ñaimo’ã ñane akãraku haguére Ñandejára rapére jajagarrapataha ñande péchore oĩmíva, ha upéi ndaikatúi ñamboapu’a.

ÑAÑEMBO’E OÑONDIVE

Ñandejára Jesucristo, orembo’emína rombojoajukuaa haguã akã porã, tetia’e ha jerovia reheve. Ikatu haguãicha romohu’ã umi tembiapo nde rérape romoñepyrũva. Amén.

Pa’i Jasy