Ñahendu Hesu Ñe’ẽ. Domingo 24º Durante el Año

Escucha el evangelio y la reflexión en: https://youtu.be/dIMGsf5EgJI

Domingo 24° Durante el Año Ciclo C. Lucas 15, 1 – 10

Upérõ, Jesús ombo’e jave hína, oñemboja hendápe umi impuésto okovráva Róma peg̃uarã, ha ijapytépe kuéra hénte reko vai atýra, oúva ohendu haguã chupe. Umi Moisés léi ombo’éva ha fariséo kuéra katu osẽ oñe’ẽ Jesús rehe.

He’i hikuái: — Kóva niko oiko gente reko vai ndive, ha okaru avei hendive kuéra. Upépe Jesús omombe’u chupe kuéra ko káso: Ja’éntena perekoha 100 ovecha, ha okañy mba’e pende hegui peteĩ. Mba’épa pejapóne. Ndapeheja mo’ãi nga’u piko umi 99, ha pesẽ peheka pe okañy vaekue.

Ág̃a pejuhúvo, pehupíne pende apére, ha vy’apópe pejevy pende rógape. Pehenóine pene irũme ha umi pende róga jere rupi oikóvape: “Pejúpy javy’a. Ajuhúma niko pe che ovecha okañy vaekue.” Che ha’e peẽme, péicha avei ojehuha yvágape. Tuichave vy’a oiko upépe peteĩ heko vaíva oñembojáva Ñandejára rehe, umi 99 imarangatúvagui rehe noikotevẽiva oñemboja.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Ñande vaíramo jepe niko nañandevaipái, ha ñaneporãramo jepe nañaneporãmbái. He’i lo mitã. Pe ñane porã pa’ũme oime mante va’erã katuete naiporãiva, ha pe ñande vai apytépe oiméne katuete ndaivaíriva. Ha péicha niko ñande ko yvy apére jaiko. Ndaikatúi ja’e avavére hembiapo porãramo jepe ndaikatuichéneha ojapo ivaíva, térã hembiapo vaíramo jepe ndaikatu mo’ãiha ojapo iporãva.

Ha péicha vaicha Ñandejára ñande recha oma’ẽvo ñande rehe. Ku ñande sy ñande recha háicha. He’i voi ningo ñe’ẽ: Sýpe guarã ndaipóri memby ivaíva. Taha’e ha’e háicha. Taivai ivai háicha hembiapo pe sy katuete he’íne imembýre imba’e porãha. Oimenteha ojavy imi hape ha oñedesatina. Ha ndohejarei mo’ãi chupe ojavy haguére. Oñeha’ã ha oñembo’evéta uvei hese jahechápa ndoguerúi jey tapépe.

Ñahendu ouha oñemboja Jesús re gente reko vai atýra ha impuésto okovráva Roma pe guarã . Ndaha’éi etéva hína oñembo’e ha oikóva tupaóre.

Jesús katu omoguahẽ ha ombo’e Ñandejára ñe’ẽ ichupe kuéra ha oho hógape ha mba’e. Ha umi fariseokuéra, tupaógui nosẽiva, oñepyrũma oñe’ẽ guyguy Jesús re. Mba’éichapa aipo Ñandejára remimbou ojehe’áta gente vai ndive.

Ha péva niko che irũ ha che reindy, pe Jesús oúva ñanembo’e. Ha’e ndoúi okondena ha orrepuntávo hembiapo vaívape. Ha’e ou ohekávo umi okañýva ogueru jey haguã Ñandejára korapýpe, upépe ñanemboguapy haguã peteĩ atýpe. Ivai ha iporãva oñondivepa.

ÑAÑEMBO’E OÑONDIVE

Ñandejára Jesucristo, aníkena eheja rojeguaru ha roñemomombyry ore rapicha hembiapo vaívagui, orembo’e roñeha’ã haguã roho hendápe ha rogueru jey ore apytépe. Amén.

Pa’i Jasy