Ñahendu Hesu Ñe’ê. Jueves 26 de diciembre

Escucha el evangelio y la reflexión en: https://youtu.be/VJXYYum6Uek

26 de diciembre (San Esteban)

Mateo 10, 17 – 22.

Jesús he’i idisípulokuérape: 7 Peiko kuaáke. Cháke oĩta pende reraháva karai juez
renondépe, ha peñembyepotíta tupao rupi. 18 Ha che disípulo haguére peẽ, pejereraháta
rréi kuéra renondépe. Peichahápe, pene mandu’áta chupe kuéra ha umi hudio’ỹvape che
rehe. 19 Ha pene moĩ ramo hikuái mburuvicha kuéra pópe, ani pejepy’apy mba’épa pejéta
térã mba’éichapa peñe’ẽta. Ija vove peẽme peñe’ẽ haguã, Ñandejára voi omoĩta pende
jurúpe mba’épa pejéta. 20 Ha ndaha’e mo’ãi voi peẽ peñe’ẽtava. Nahániri. Ñandejára
Espíritu pe oñe’ẽtava pende juru rupi.

21 Tyvýra ha teindýra opu’ãne ojuehe, ha peteĩ ome’ẽne ambuépe ojejuka haguã. Túva ha
sy ome’ẽne ta’ýra térã imemby. Mitã katu opu’ãne túva ha sýre ha ojuka. 22 Che disípulo
haguére peẽ, avave nda’ija’e mo’ãi pende rehe. Che rehe ojeroviáva ipahaite peve katu,
oikovéta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Pe mitã oúva yvy ári niko ogueru ramo jepe tuicha vy’a, ou avei jehasa asy
pa’ũme. Pe kuña imemby haguã niko hasy asy chupe hetépe upe mitã ñesẽ hyepýgui,
opáichavo oguahẽ rire hesarái pe jehasa asýgui ha ndaijái ipype vy’águi ohecha ramo
chupe ijyva ári.

Ko árape ñanemandu’a hina San Estébanre, ha’éva hina umi Hesu disípulokuéra apytépe upe, Hesu rire, ojejuka va’ekue ijerovia rehe, ha upéicha ha’e oñemopeteĩ Hesúndive, hekovépe ha avei imanóme.

Ñama’ẽvo ñande pesébrere niko jahecha mba’éichapa pe Hesu rekove oguerúma voi ijypyete guive pe jejopy ha jehasa asy. Noñemoguahẽi ha nahendáigui ou onace mboriahu apĩcha peteĩ vaka kehápe. Ha uperiremínte ojehekágui ojejuka haguã, apúrope oho okañy Egipto pe.

Ha upéva ohechaukáma ñandéve hina iñepyrũmby guive mba’éichatapa upe Hesu rape, ha mba’éichatapa avei umi oguatáva Hesúndive.

Mba’etekópa che irũ ha che reindy, upe ivevúi ha igústo aja niko opa mba’e iporã, ágã katu oñeñe’ẽ vai vove ñande rehe, ojekopi vove ñande lómore, oime ramo ñane muñáva, opuka ha oñembohorýva ñande rehe cristiano haguére, jajerovia haguére Ñandejára rehe, jaiko haguére tupaóre katu ijetu’uvéma. Opáichavo ñama’ẽvo San Esteban, ha Hesu rehe, ome’ẽ vaekue hekove ijeroviáre, ikatu avei ñande jaropu’aka umi mba’e ñande jerovia ha Ñandejára pytyvö rupive.

Pa’i Jasy.