Ñahendu Hesu Ñe’ê. Miércoles 25 de diciembre

Escucha el evangelio y la reflexión en: https://youtu.be/seX8GOcNEn4

25 de diciembre: Lucas 2, 1-14.

1 Jesús onase mboyvemi, emperador Augusto ojapouka peteĩ sénso oikuaa haguã máva-
mávapa hína umi oikóva ipoguýpe. 2 Quirínio upe ramo gobernador akue Síriape, ha chupe ho’a ojapóvo pe sénso Palestínape. 3 Opavave oho vaerã ivállepe, omoĩ haguã héra kuatiápe.

4 Upévare, José osẽ Nazarétgui opytáva Galiléape, ha oho Belénpe oĩva hína Judéape.
Upépe niko onase vaekue rréi David, ha José niko David ñemoñare va’ekue. 5 María niko
upérõ hye guasetéma hína, ha oho ave José ndive. 6 Ha Belénpe oĩ aja hikuái, Maríape
oguãhẽ hi’ára imemby haguã. 7 Ha ndojuhúigui hikuái mamove opyta haguã, oheja chupe kuéra opyta óga guýpe mymba kuéra apytépe. Ha upépe onase imemby kuimba’e. Omonde mitã aópe ha omoñeno peteĩ mymba karuhápe.

8 Belén ypýpe oĩ upe pyhare ovecha rerekua oñangerekóva hína ñúme hymbakuérare. 9
Peichaháguinte ojechauka sapy’a chupe kuéra Ñandejára ángel peteĩ. Ha Ñandejára mimbipa ojaho’ipágui chupe kuéra, okyhyjepa hikuái. 10 Ñandejára ángel katu he’i chupekuéra: “Ani pekyhyje. Aru hína peẽme marandu iporãva, ombovy’átava opavavépe. 11 Péina ko pyhare onase kuri, David vállepe, pende salvador. Upéva hína pe Mesías, Ñandejaraite voi. 12 Peikuaáta mávapa, pejuhúvo oñeñuã mitã aópe, ha oñeno hína vaka karuhápe.”

13 Upéicha háguinte, ojechauka sapy’a yvágape heta Ñandejára ángel, oguerohorýva Ñandejárape, ha he’íva: 14 Toñemomba’e guasu yvágape Ñandejára, ha py’a guapy tou
opa yvypórape, Ñandejára ohayhúva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ko navida árape oime jepi mitãnguéra okorréva ohecha vesíno kuéra pesébre,
opurahéi hikuái upe níñope ha oñembo’e Tupãsýme. Ha ñame’ẽ vaerã chupe kuéra
caramelo, pan dúlsemi, cleriko michimínte ñame’ë, ani ñamonga’u mba’e, ani oho he’i
hikuái isécoha la ñande pesebre.

Heta purahéi porã oĩ ko navidápe, Navida de flor de coco, Dos trocitos de
madera ha mba’e. Oime avei pe purahéi porãite ojapo vaekue Emiliano R. Fernández
níño ára peguarã, he’íva: Ñesuháme ne rokẽme aju rofelicita, arúvo ndéve guarã ne
santo ára guahẽme, ko ivíspera pyharépe tupaópe orrepica la incomparable alegría
oanuncia ne nacimiento.

Opa tetã rupi oi purahéi Navida rehegua, ha opáguio avei oime omýiva ha osẽva hetãgui, osẽ haguéicha mombyry ivállegui José ha María. Umíva oñehenói hína migrante. Heta ñande vallegua paraguayo osẽ va’ekue ñane retägui oiko avei ichuguikuéra migrante. Sapy’ánte oñandu avei hikuái noñemoguahẽ poräi ha oñemboyke ramo imboriahu haguére.

Ajépa iporãite vaerã che reindy ha nde che irũ, ojapo haguéicha umi pastóre, ohóva ohecha pe níñope, isy ha José pe, ndaha’éi ramo jepe ivallegua, ñande ave ñañandu ramo ñane pehenguéicha ha ñamoguahë porä ramo umi ñande rapicha migrante imboriahúva. Iporaiténe ñañembo’e ha japurahéi hendive kuéra Ñandejara’ípe ñande py’aite guive, opurahéi haguéicha umi angel kuéra vy’a ha py’aguapýpe.

Pa’i Jasy.