Ñahendu Hesu Ñe’ẽ. Jueves VI de Pascua

Escucha el evangelio y la reflexión en: https://youtu.be/WPCeLjLYhoI

JUEVES VI DE PASCUA

San Juan 16, 16-20

Oguãhẽ mboyvemi ára Jesús ohejávo ko yvy oho haguã itúva rendápe, he’i idisípulokuérape: Ágãmive ha nda che recha mo’ã véima hína. Upe riremínte katu che recha jeýne.

Jesús disípulokuéra oporandu joa ojupe: — Mba’éiko ko he’iséva. He’i ñandéve ndajahecha mo’ã veimaha chupe, ha ágã upe riremínte jahecha jeytaha, ha mba’ére piko he’i aháta túva rendápe. Mba’éiko he’ise he’i ramo “ágãmive”. Ndajaikuaái niko mba’épa he’ise.

Jesús ohecha kuaa idisípulokuéra oguerekoha oporanduséva chupe. Ha he’i chupekuéra: — Ha’e niko kuri peẽme ko’ẽrõite nda che recha mo’ã veimaha, ha upe riremínte che recha jeytaha. Upévare piko peñe’ẽ hína ra’e.

Añete ha’e peẽme, pene rasẽ ha peñembyasy va’erã ágã, upe aja katu, yvypóra kuéra ovy’apa joa vaerã. Ha peñembyasy ramo jepe, upéi pene ñembyasy hendaguéta vy’ápe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñane kyre’ỹ ha javy’a jave, ñande retia’e opa mba’e jajapo haguã, ñande peju jave yvytu porã ñañandu Ñandejára ñande rovasa. Ha’ete voi ku ñande ykére oiméva ha hendive jagueropu’akataha opa mba’e, jaraháta ñane renonderã jatopáva, tou la oúva.

Upéicha jave, he’i San Ignacio, jaikuaa vaerã nameméi péicha ñañeñandutaha, jahupi va’erã pytu, ñambyaty pu’aka, jaagradese vaerã Ñandejárape ha ñanemandu’ávo mba’éichaitépa ñane kangy ha ñane arruinado jahasa asy jave.

Hesu he’i ohejataha iñirũ nguérape ha upépe ijetu’utaha hendivekuéra opytáramo ha’eño. Ñande avei ningo ñañandu ñane ñoha ára pytũ ñande aho’i vove, he’i háicha Emiliano: “Che ygue ygue rei imposible ndavy’ái”. Ha’ete voi umícha jave Ñandejára okañy ha hesaráiva mba’e ñande hegui. He’i San Ignacio: péicha jave tekotevẽ ñane pasiénsia ha jagueroguatakuaa vy’a’ỹ. Jaikuaa vaerã Ñandejára nañanderejáiha, he’i háicha Hesu: “ndacherecha mo’ãvéi ha uperiremínte che recha jeýta”.

Nañañandúi ha ndajahecháiramo jepe ha’e oime hína ñanendive, he’i San Ignacio, jareko pu’aka ñaikotevẽva mbeguekatúpe ñasẽ haguã tapépe. Nañandepy’a mano va’erãi ijetu’u jave, jaha vaerã hese mbói jo’ópe, jaikuaa pype uperiremínte Ñandejára ñane
ruguaitĩ ha ñanembyetia’e jeytaha.

Noiméi ningo ñande pópe jaguerúvo ñande py’ápe vy’a térã vy’a’ỹ, ku arai ha ama ou háicha, ñande ndaikatúi jajoko, ñaharõ mante ohasa, opi, hesakã ha ikã jey ñande rape, osẽ jey kuarahy, opuraheipa guyra.

Upéicha Ñandejára ñanesãmbyhy jaikuaa haguã mávapa ñande, ani haguã ñaimo’ã ñande pu’akataha opa mba’ére, ñañakãity haguã henondépe ha ñanemoĩ haguã jaguata ipoguýpe.

Ndépa mba’e rejapo che reindy, ha nde che irũ, ijetu’u vove nendive la korrída. Máva ha mba’éguipa eñeprende ha mamópa eheka piro’y haku vove la yvy.

Pa’i Alberto Luna.