Ñahendu Hesu Ñe’ẽ. Miércoles VI de Pascua

Escucha el evangelio y la reflexión en: https://youtu.be/7ohjlScnuOs

MIÉRCOLES VI DE PASCUA

San Juan 16, 12-15

Oguãhẽ mboyvemi ára Jesús ohejávo ko yvy oho haguã itúva rendápe, he’i idisípulokuérape: Heta mba’e niko areko gueteri ha’e vaerã peẽme. Ko’ágãnte ndaikatu mo’ãi oikepa peẽme pene akãme. Ágã Espíritu Santo ou vove, ha’e ohechaukáta peẽme umi mba’e añeteguáva.

Ha’e niko noñe’ẽ mo’ãi ijehegui reínte. Nahániri. Omombe’úta peẽme umi mba’e ha’e ohendu vaekue, ha oikuaaukáta ave peẽme umi mba’e ojehútava. Ha’e che kuaaukáne peẽme ha che momba’e guasúne. Upe che ame’ẽvagui chupe ha’e oikuaaukáta peẽme. Opa mba’e che ru oguerekóva, che mba’e avei.

Upévare ha’e hína peẽme Espíritu Sánto ombyatytaha che ame’ẽvagui chupe oikuaauka haguã peẽme.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñande sy, ñande ru ha ñanembo’e hare ñe’ẽngue nañanderesaráiri. Umi mba’e porã he’i ha ohechauka va’ekue ñandéve opyta amo ñane ánga ruguápe oguapy, ndoje’ói ha ndoguéi. Akóinte ñane mandu’áva hese kuéra ha ja’éva: ma’ẽna nde, peichaite ko he’ímiva voi ñandéve mamita, péicha ha péicha he’ímiva taita, péicha ñanembo’e vaekue, péicha jakakuaa ñande.

Ha upe ñane mitã ramo guare ñande pyahu, ñane mitã rusu jave, jajerovia ñande jehe ha nañahenduse guasúi ramo jepe umi kakuaa ha tuja térã guaiguĩ ñe’ẽ, heta mba’e jahasa rire jahávo ñande rekovépe katu, mbeguekatúpe upéi jaju jahecha umi ñe’ẽ oje’e vaekue ñandéve ndareíri hague, hendápe porã oje’e raka’e, añete raka’e, ñandénte nañandepy’ái gueteri upérõ ñaikumby ha jahechakuaa haguã.

Ha upéicha avei Hesu oñandu iñirũ nguéra ohendu ramo jepe iñe’ẽ ndoikeiha iñakãme ha ndoguapýi ipy’ápe ombo’éva chupe kuéra, ha upéicha avei Ñandejára ohecha ñande nañande pu’akaiha iñe’ẽre ñamboguapypa haguã ñande jehe ha oikepa haguã ñane akã ha ñane ángape. Tapére jahávo mante jaike eskuélape, he’i háicha lo mitã, jajesape’a ha japilla umi mba’e okañy vaekue ñande hegui ñahendu ramo jepe.

Hesu niko he’i ombou ñandéve Espíritu Santo ñanemomandu’áva iñe’ẽnguére ha oñandukáva ñandéve mba’épa jajapo vaerã. Ñandejára ko ipasiénsia ñande rehe ha mbeguekatúpe ñanerekombo’e ha ñanesãmbyhy. Sapy’ánte ñanemosãmbyky ijehe ha oñeñanduka ñande ykerete. Ha upéi katu opoi imi jey ñande hegui ha ñanemosãmbuku.

Opáichavo nañanderejaitéi, ñanembojere ha omomýi ñande py’ápe heta mba’e porã Espíritu Santo rupive, oipe’a ohóvo tape ñanerenonderã.

Ndépa eñandu sapy’ánte opáy nde py’ápe ha nembyetia’éva ejapo haguã iporãva. Nemandu’ápa sapy’ánte Ñandejára ha Tupãsýre. Oúpa ndéve ne akãme Hesu ñe’ẽngue eimo’ã’ỹetére. Umíva ko hína che reindy ha nde che irũ, Espíritu Santo omomýiva nde
pype nepytyvõ ha oñandukávo ndéve Ñandejára oimeha nendive.

Pa’i Alberto Luna.