Ñahendu Hesu Ñe’ẽ. Lunes VII de Pascua

Escucha el evangelio y la reflexión en: https://youtu.be/UEpPK88SQ1c

Lunes VII Pascua

Juan 16, 29-33

Upérõ Hesu disípulokuéra he’i chupe: — Ko’ágã ae reñe’ẽ sakã porã hína, ha roikuaa mba’épa upe eréva. Ko’ágã rohecha kuaa nde reikuaaha opa mba’e ha natekotevẽiha avave oporandu ndéve mba’eve. Upévare roguerovia rejuha Tupãgui.

Jesús he’i chupekuéra: — Añete piko peguerovia ko’ágã. Oguãhẽta hína ára, ha oguãhẽma voi katu, pene sarambítavo peẽ opa rupi rei. Upévo, che rejáne ágã cheño.

Naime mo’ãi jepe niko cheño, che ru oĩtagui che ndive. Amombe’u hína peẽme ko’ã mba’e pejuhu haguã py’aguapy pejoajúvo che ndive. Heta pehasa asýta hína ko yvy ári. Péicharõ jepe, aipota pende py’a guasu. Che poguýpema niko oĩ ko yvy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Apóstolkuéra he’i Hesúpe, ko’ãga hesakãma oréve upe eréva ha roikuaa porã upe orembo’e va’ekue. Ha Hesu he’i chupekuéra: Peikuaa añete pene akãme, opáichavo tekotevẽ oguejy pende py’ápe, tekotevẽ pehasa upe che ahasáta hárupi peikuaa haguã añete mba’épa umi mba’e ha’e vaekue peẽme.

Ñande avei jaikuaa Ñandejára remimbo’e, jajapo vaerã ha jajapo’ỹ va’erã, opáichavo pe jaikuaa haguérente nde’iséi hína jajapotaha. Heta tembiapo porã jaikuaáva ndajajapói ha heta ivaíva jaikuaávagui ndaikatúi jajeheja.

He’i ningo San Ignacio: Ndaha’éi hína heta mba’e jaikuaa rupi ñande py’a renyhẽtaha vy’águi, ndaupéichai hína, ñañandu pypuku ha ñamboguapy ramo ñane korasõme umi Ñandejára ñanembo’éva, upépe katu ñande py’a renyhẽta vy’águi.

Aipo ramo ndaha’éi pe jaikuaáva ñane akãmente upe ñanemboguatáva Hesu rapére. Upe Espíritu Santo oñandukáva ñandéve ñane korasõme, upe ñanembojoajúva Hesúre hína upe ñanemboguatáva jeroviapópe ñande rapichakuéra ndive. Hasy niko ñame’ẽ haguã ñande rekove, ñane rembiapo, ñane tiémpo, ndajahayhúi ramo pe mávape, nañañandúi ramo ñande py’aite guive tuicha mba’eha ñandéve guarã.

Jahayhúvape mante ñamoirũ ijetu’u vove, ha ndajahejái ha’eño oikotevẽ vove. Pe mborayhu hína upe ñanembo py’aguasúva ha ome’ẽva ñandéve pu’aka heta mba’e jaropu’aka ha ña’aguanta haguã. Hesu oreko pe mborayhu ñande rehe ha upévare ipy’aguasu ogueropu’aka haguã opa mba’e ñande rayhupápe.

Oiméne nde avei che irũ ha nde che reindy rehasáma heta mba’e umi rehayhúva rehe hápe. Ñandejára ome’ẽ ndéve pu’aka nde resaráivo nde jehegui, eñembotapykuévo nde, eme’ẽmbaite haguã rehayhúvape eñangareko haguã.

Ha mba’éichapa nde reñandu oimeha nde pype pe Ñandejára rayhu, rehayhúpa Hesúpe, reimépa ehasa haguãicha upe ha’e ohasa hague rupi. Reñanimápa. Egueropu’akánepa.

Pa’i Alberto Luna.