Ñahendu Hesu Ñe’ẽ. Sábado VI de Pascua

Escucha el evangelio y la reflexión en: https://youtu.be/P9M85erw4Mg

SÁBADO VI PASCUA

San Juan 16, 23b-28

Oguãhẽ mboyvemi ára Jesús ohejávo ko yvy oho haguã itúva rendápe, he’i idisípulokuérape: Che ru ome’ẽta peẽme opa mba’e pejeruréva chupe che rérape. Ko’agãite peve niko ne’ĩra gueteri pejerure chupe mba’eve che rérape. Pejerure ha oñeme’ẽta peẽme, pene
renyhẽ haguã vy’águi.

Amombe’u niko aikóvo peẽme káso hamba’e peikuaa haguã mba’épa ha’ese peẽme.

Oguãhẽ vaerã jepe niko ára nañe’ẽvéivo peẽme péicha. Upévo, amombe’u porãne peẽme opa mba’e che ru rehegua. Upéva upe árape, peẽte voi pejeruréta chupe che rérape. Ha natekotevẽ mo’ã véima che ajerure chupe pende rehe, che ru pende rayhúgui.

Ha’e niko pende rayhu, peẽ chéve che rayhúgui, ha pegueroviágui che ajuha Tupãgui. Che ru rendágui niko asẽ va’ekue aju ko yvy ári. Ko’ágã katu ahejáta ko yvy, aha jey haguã che ru rendápe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Pe tekotevẽ ningo tuicha mba’e hina. Ipo’i vove la pióla ha jajecha ramo ñeikotevẽme mante jaikuaa mba’épa he’ise upe ndajarekói ha ndajaikuaái mamógui ha mba’éichapa jahupytýta hina upe ndajarekóiva. Taha’e plata, pohã, tembi’u, ao, óga, trabajo, taha’e ha’éva; ndajarekói ramo ha ndajahupytýi ramo hina ivai la pórte.

Ha ndaikatúi ramo ñasẽ ñande jehegui niko jajepokã mante ñande rapicha ikatúva rehe ñane pytyvõ ha jajeroviáva ohechakuaáne haguã ñane remikotevẽ. “Huguy asy pe tapicha ojeruréva korasõ”, he’i ningo Martín Fierro ñe’ẽ. Ha upéicha ningo añete, upe ñande rapicha oúva ojerure niko ñambyasy ha jaiporiahuverekógui ñaipytyvõ.

Tupã Ñandejárama katu ñane mbyasy ha ñandeporiahuvereko ñande recháramo ñeikotevẽme, ha ichupe -he’i ñandéve Hesu- jajerure haguã jaipotáva ha ñaikotevẽva, ha’e ñande rayhúgui ha ome’ẽségui ñandéve opa mba’e porã.

Ha mba’épa upe jahayhu ha jajerure vaerãva Ñandejárape. He’i ningo San Felipe Neri: “Upe oipotáva umi mba’e ndaha’éiva Cristo rehegua, ndoikuaái oipotáva; upe ojeruréva umi mba’e ndaha’éiva Cristo rehegua, ndoikuaái ojeruréva; upe nomba’apóiva Cristo rehehápe, ndoikuaái ojapóva”.

Jajerure aipóramo Tupãme tajahayhu añete Ñandejára Hesukrísto pe, jaipota, jajapo ha jajerure haguãicha umi mba’e porã añete ha’e orekóva, ha Ñandejaŕa ñande ru ome’ẽséva ñandéve ñanemyenyhẽ haguã imborayhúgui.

Mba’épa hína che irũ ha nde che reindy umi mba’e porã Ñandejaŕa Hesukrísto reheguáva eipotáva hína eikóvo ha ejerureséva nde py’aite guive Ñandejára ñande rúpe.

Pa’i Alberto Luna.