Ñahendu Hesu Ñe’ê. Martes 07 de enero

Escucha el evangelio y la reflexión en: https://youtu.be/cQQZ8AuGX1Q

Martes Epifanía rire Marcos 6, 34-44

Oguejývo Jesús pe kanóagui, ha ohechávo hetaha umi ijatýva, oiporiahuvereko chupekuéra, oĩgui ovecha herekua’ỹvaicha. Ha oñepyrũ ombo’e chupekuéra heta mba’ére. Ka’aru pytũmaramo idisípulo kuéra ou hendápe, ha he’i chupe: Ka’aruetéma niko, ha ko’arupi ndaipóri avave oikóva.

Emondo mba’éna opavavépe toho umi táva rupi, tojogua hembi’urã. Jesús katu he’i chupekuéra: Peẽ voi pemongaru chupekuéra.

Ha’ekuéra katu he’i chupe: – Reipota piko roho rojogua 200 pláta repy pan, romongaru
haguã chupekuéra?

Jesús he’i: – Mbovy pan piko pereko? Tapeho pehecha.
Oikuaa vove he’i chupe: – 5 pan ha mokõi pira.

Ha omboguapy opavavépe aty-atýpe, kapi’ipépe. Ha oguapy hikuái peteĩ atýpe 100 ha ambuépe 50. Upéi katu ohupi ipópe umi 5 pan ha mokõi pira ha oma’ẽvo yvága gotyo ohovasa. Upéi oipehe’ã umi pan ha ome’ẽ ohóvo idisípulo kuérape, ha ha’ekuéra ome’ẽ opavavépe. Oipehe’ã avei umi pira opavavépe. Opavave ho’u hyvatã meve.

Ombyaty hikuái umi pan ha pira pehẽngue hembývagui, ha omyenyhẽ 12 ajaka. Umi
ho’u va’ekue pe pan niko hína 5.000 kuimba’e rupi.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Pe yva térã kóga ra’ỹi michĩva oñeñotỹ rire, heñói, okakuaa ha heta osẽta hina hi’a, ha upégui heta jey ha’ỹita ha hi’a jevýta ikatu’ỹve hapeve jaipapa. Ko mitã michĩmi Karai José ha Ña María oraháva hina ijyva ári, avave noimo’ãi michĩgui ha imboriahúgui peichaite peve ombyatýne haguã ijehe opaichagua tapicha ko yvy ári.

He’i niko San Ignacio Ñandejára Túva, Ta’ýra ha Espíritu Sánto ndaje raka’e yvága guive oma’ẽ ko yvy ipekuévo ha ohecha opaichagua tapicha, morotĩ ha hũva, oñorairõ ha oikoporãva, hesãiva ha hasýva, hasẽva ha opukáva, onaséva ha omanóva.

Ha ohechávo mba’éichapa heta umi oñehundíva ha ohóva aña retãme, oiporiahuverekógui ita’ýra ha itajýra kuérape ombou Hesúpe oiko haguã ñande apytépe.

Hesu oma’ẽvo umi hentetárehe, okañy ha oikóva apytĩmby, oiporiahuvereko chupekuéra, ombo’e ha oipohano, omongaru ha omoyvatã. Hembypa ha ochovi pe Ñandejára grásia oñeme’ẽva ñandéve ha opavavépe Hesu rupive. Eñemboja katu hese aipóramo che irũ ha che reindy, jeroviapópe tanerekombo’e, tanepohano, tanemongaru ha tanemoyvatã ndéve avei.

Pa’i Alberto Luna.