Ñahendu Hesu Ñe’ê. Lunes 06 de enero

Escucha el evangelio y la reflexión en: https://youtu.be/Fp3Rx2K6DDI

Lunes después de Epifanía Mateo 4, 12-17. 23-25

Jesús ohendúvo Juan ho’a hague préso, oho jey Galiléape. Osẽ Nazarétgui ha oho
Cafarnaúmpe, opytáva Lágo Galiléa rembe’ýpe. Upépe niko oiko vaekue yma Zabulón ha
Neftalí ñemoñare kuéra. Péicha ou ojehu ku Isaías he’i vaekue: Pehendu peẽ Zabulón ha
Neftaligua peikóva lágo jerére, ha Jordán mboypýri. Ehendu nde, Galiléa, rembyatýva
pytagua. Peẽ peikóva pytũmbýpe, ko’ágã pehecháta tesape tuicháva. Peẽ peikóva ku
pemanórõ guáicha ko’ágã peikovéta.

Upe guive Jesús oñepyrũ oñemoñe’ẽ. He’i: — Pejevy Tupã gotyo. Hi’aguĩma hína
Ñandejára Réino.

Jesús heta oiko Galiléa rupi. Oikémiva ombo’e tupaópe ha omoherakuã ñe’ẽ porã Ñandejára Réino rehegua. Hetápe omonguera opaichagua mba’asy vaígui. Jesús herakuã opa rupi Siria tuichakue. Ha ojegueru hendápe opaichagua hasýva, demóño poguýpe oikóva, itarováva, umi iñakãvaíva ha oguata’ỹva. Umíva Jesús omonguerapa.

Upéi katu hetáma sapy’a ohóvo umi oikóva Jesús rapykuéri oúva Galiléagui, Decápolis, Jerusalén, Judea ha Jordán mboypýri guive.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Tuicha la mundo, he’i ningo ñe’ẽ. Opavave ñandeja ipype, peteĩ hendápe
nañandejáiramo ikatu jaha jajeheka ambue hendápe, peteĩ hendágui ñañemosẽramo ikatu
jaha jaheka mamo ñañemoguahẽ haguãme, oiméramo nañanerenduséiva jaha ñañemoñe’ẽ
ambue ñande rapicha ñanerendusévape.

Jahecha Hesu osẽ oho mombyry táva guasúgui ohechágui Juan Bautista ojeapresa hague ha ikatuha avei ho’a hi’ári ha iñirũ nguéra ári mburuvicha Herodes po pohýi, upémaramo okañy hikuái upégui oha’arõ ohasamive pe mburuvicha pochy vai ou jevy haguã upéi. Oho hikuái upe aja umi mombyryve oĩva rendápe, ityre’ỹvévape ohenduka haguã ichupekuéra avei upe Ñandejára ñe’ẽ.

Ha ipahápe pe Herodes pochy rupi Hesu ha umi apóstolkuéra oguahẽ heta mboriahu ha hesaitéva rógape. He’i ningo San Pablo, umi Ñandejárape ohayhúva peguarã umi mba’e vai
ohasávagui jepe ikatu osẽ mba’e porã amo ipahápe. Upévare che irũ ha nde che reindy
oiméramo rehasa asy térã ejejopy vai, ikatu epensa: Mba’épa onohẽta hína Ñandejára kóvagui, mba’éichapa omohendáta jehovasa ahupyty haguã ko javoráigui asẽ rire, mba’e
grásia porã rapépa ko aipykúiva hina.

Pa’i Alberto Luna.