Ñahendu Hesu Ñe’ê. Domingo 05 de enero

Escucha el evangelio y la reflexión en: https://youtu.be/-eH7U1enG40

Ñandejára jehechauka. Epifanía. Mateo 2, 1 – 12

Jesús niko onase va’ekue Belénpe, Judéape. Herodes vaekue rréi upérõ. Oguãhẽ katu Jerusalénpe, kuarahy resẽ guio oúvo, mbohapy karai arandu. Oguãhẽmba riremínte oporandu hikuái upépe:

— Moõiko oime pe mitã onase vaekue hudío kuéra rréirã. Rohecha niko kuarahy resẽme mbyja chupe omohenondéva. Ha roju hína romomba’e guasu haguã chupe.

Herodes oikuaávo upéva ipy’a tarovaite. Ha opa Jerusalengua upéichante avei. Upémarõ, Herodes ombyatypa ijerére pa’i ruvicha kuéra, ha umi hudío kuéra léi ombo’éva. Ha oporandu chupekuéra moõpa onase va’erã ra’e pe Mesías.

Ha’ekuéra he’i chupe: — Belénpe, Judéape. Proféta niko oheja va’ekue kuatiápe he’i ramo guare kóicha:
“Ha nde Belén reiméva Judápe, nane michĩvéi mba’eveichave ramo puéblokuéra apytépe upe tetãme. Ndehegui osẽta rréi oisãmbyhýtava che retã Israel.”

Upépe, Herodes ohenoika kañyháme umi karai arandúpe. Ha oporandu chupekuéra araka’etépa ohecha ra’e hikuái pe mbyja.

Upéi katu omondo chupekuéra Belénpe, he’ívo: — Tapeho peikuaa porã moõpa oĩ hína pe mitã. Pejuhu rire, peju pemombe’u chéve. Che ave ahase amomba’e guasu chupe.

Herodes oñe’ẽmba riremi, umi karai arandu osẽ oho. Ha pe mbyja ha’ekuéra ohecha va’ekue kuarahy resẽvo, oho henonderã. Upéi katu opyta pe óga pe mitã oĩha ári. Umi karai arandu ohechávo moõpa opyta pe mbyja tuicha ovy’a. Oike hikuái pe ógape, ha upépe ohecha pe mitãmi, isy María ndive. Oñesũ ha omomba’e guasu chupe hikuái. Upéi katu oguenohẽ ikarameguãgui óro, insiénso ha mírra ryakuã porã, ha ome’ẽ chupe. Ñandejára he’i rire chupe kuéra iképe ani haguã oho Herodes rendápe, osẽ oho hikuái hetãme ambue tape rupi.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oiméne mitãnguéra ijayvu joa cállere ohechauka ojupe mba’épa ogueru lorréye, ha umíva
pa’ũme oime ndorekóiva mba’eve, isy ha itúva ndohupytýigui ojogua haguã chupe kuéra.

Hetáma voi ningo oĩ la gásto ko Navida ha áño pyahúre, ha lorréye árape ñaguahẽvo katu ipo’íma la pióla, hetápe ndohupytyvéima oipotáramo jepe.

Ñahendu purahéipe oñembyasy upe mitã hesaráigui chugui lorréye, ha ojerure asy isýpe:
“comprámena mamíta aipotánteko che ave”. Heta py’áre opoko kóva ko purahéi ha oime ojapóva campaña ombyaty haguã mitãnguéra peguarã regalo ha upéi omoguahẽva chupekuéra.

Mba’épa amo hapópe ñanembo’e ko’ã karai arandu mombyrýgui oúva? Ñande niko ama’ẽterei pe regalo Hesúpe oguerúvante. Pe tuichave mba’e ñanembo’éva hikuái hina jaheka Hesúpe, ñañemoĩ tapépe ipuku ramo jepe jajuhu peve. Pe tuichave jopói niko ndaha’éi lo rréye oguerúva, pe tuichave mba’e niko pe Tupãsy ha San José ohechaukáva chupekuéra. Jaikuaa Hesúpe, ñañandu chupe ñande rekovépe, jajesareko hese, upéva ha’e pe rregalo tuichavéva ikatúva jahupyty ha ñame’ẽ.

Pa’i Jasy.