Ñahendu Hesu Ñe’ê. Viernes 03 de enero

Escucha el evangelio y la reflexión en: https://youtu.be/ZSJ8j3xYL3s

3 de enero San Juan 1, 29-34

Upe ára ko’ẽme, Juan ohecha Jesúspe oñembojáva oúvo hendápe. Upépe osẽ he’i:
Péina ápe ou hína Ñandejára ovecha ra’y oipe’átava opavavégui ipekádo. Ha’e hína upe che
mandu’a hague peẽme ku ha’érõ guare: “Che rire oúta peteĩ tuichavéva chehegui, ha’e
oikove haguére che aikove mboyve.” Chete voi ndaikuaái vaekue mávanepa ha’e. Péicharõ
jepe, pomongarai aikóvo ýpe, opa Israelgua oikuaa haguã mávapa ha’e.

Che ahecha va’ekue Espíritu Santo oguejýva yvágagui ku pykasúicha ha opyta hi’ári.
Upérõ, che ndaikuaái vaekue mávapa ha’e. Upe che mbou vaekue chéve pomongarai haguã
ýpe, ha’e he’i vaekue chéve: “Upe rehecháva Espíritu Santo oguejyha hi’ári, upévata hína
upe oporomongaraíva Espíritu Sántope”. Chete voi ahecha vaekue, ha aikuaa porã Tupã
Ra’yha ha’e.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oime niko heta mba’e ñande jaikuáava oñemombe’úgui ñandéve, jalee haguére térã
ñahendu ha jahecha haguére radio térã télepe, ha oime katu umi jaikuaáva ñandete voi
jahasa haguére, jahecha, japoko ha ñañandu haguére ñande pirépe. Umíva oguapy ha opoko
pypukuve ñande rehe, ndoje’ói ñande py’águi péicha péichante.

He’i niko Juan Bautista ha’e oikuaaha Hesu ou va’erãha, ha oñanduha Túva
Ñandejára ojokuaiha ichupe ojapo haguã tape Hesúpe, ikatu haguãicha oha’arõ ichupe umi
Ñandejára pueblo guáva. Ha upéi ojuhu rire Hesúpe, ohecha ha ohendu rire ichupe, opoko
rire hese, oikuaa rire mba’éichapa Ñandejára añete omba’apo Hesu rupive, hatãvéntema
he’i opavavépe Hesu añetehápe ha’eha Ñandejára remimbou.

Heta niko ñande ñahendu Ñandejáragui, ikatu avei jalee ñande jehegui pe Ñandejára
ñe’ẽ, jaha misa térã ñembo’e hápe, ha upérupi jaikuaave Hesúgui heta mba’e. Opáichavo
peteĩ mba’e hina pe jaikuaáva ñane akãme ha otro merõ hina upe jajapóva, upe oguejýva
ñande py’ápe ha ñanemomýiva ñande rekovépe.

Mba’épa reñandu che reindy ha nde che irũ jajerure ramo Ñandejárape ko áñope
jajuhu haguã Hesúpe ñande rapépe, ñañandu pypukuve haguã ichupe ñande rekovépe.

Pa’i Jasy.