VIERNES 16 DE AGOSTO
16 agosto, 2019DOMINGO 18 DE AGOSTO
17 agosto, 2019LECTURAS DEL SÁBADO 17 DE AGOSTO
PRIMERA LECTURA
Ko’ágä ñahendúta Tupã Ñandejára ñe’ẽ Jueces arandukápe oĩ háicha
24, 14-29
Josué he’i hetãguápe:
Upévare, pemomba’éke Tupä Ñandejárape ha pejapo hembipota pemboyke’ỹ rehe ichupe. Umi tupã pende ru kuéra ypykue omomba’e va’ekue oiko ramo Éufrates ysyry ha Egipto rupi, peipe’a pende apytégui ha pemomba’e guasu Tupä Ñandejárape año. Napemomba’e guasuséi ramo Tupä Ñandejárape katu, ko’ágã peje va’erã mba’éichagua tupãmepa pemomba’e guasúta. Pemomba’e guasútapa umi tupã pende ru kuéra ypykue omomba’e guasu va’ekue oiko ramo guare Éufrates ysyry rupi, térãpa ko’ágã peikóguima ko’ã Amorreo yvýpe pemomba’e guasúta itupã nguérape? Che ha maymáva che rogagua romomba’e guasúta Tupä Ñandejárape.
Maymáva Israel ñemoñare he’i:
Mba’eveichave ramo noromboyke mo’ãi Tupä Ñandejárape ha noromomba’e guasu mo’ãi ambue tupã. Tembiguái ramo roiko va’ekue Egíptope ha Tupã ore Jára ore guenohẽ va’ekue oréve ha ore ru kuéra ypykuépe upégui. Heta mba’e techapyrã ojapo va’ekue ore rehehápe. Mamo tetã roikoha rupi térã mamo rohoha rupi, ha’e oñangareko va’ekue ore rehe. Hi’ári, Tupä Ñandejára voi omosẽmba va’ekue ore renonderãgui amorreo kuéra ha ambue tetãgua ko yvýgui. Ore avei romomba’e guasúta Tupãme. Ha’e niko ore Jára.
Ha Josué he’i ichupe kuéra:
Ikatu mba’e va’erã niko pemomba’e guasu Tupä Ñandejárape. Peikuaáke ha’e Tupã Ñandejára marangatuha, ha imba’erãnte pende potaha. Pepu’ã ramo hese térã pene rembiapo vai ramo, ha’e ndahesarái mo’ãi. Pemboyke ramo ichupe ha peho pemomba’e guasu ambue tupã, Ñandejára ojahéita pende rehe ha heta mba’e vai oguerúta pende ári. Pene rundíta, jepe heta mba’e porã ojapo pende rehehápe.
He’i hikuái Josuépe:
Ndaupéicha mo’ãi. Ore romomba’e guasúta Tupä Ñandejárape.
Josué he’i ichupe kuéra:
Pene mandu’áke peẽ voi peme’ẽha pene ñe’ẽ ha pejeha pemomba’e guasutaha Tupä Ñandejárape.
Ha he’i hikuái:
Ore voi upéicha ro’e.
He’i ichupe kuéra Josué upémarõ:
Penohẽ umi tupã gua’u ra’ãnga perekóva pende apytépe ha pehundipa. Ha pende py’a ite guive peñeme’ẽ Tupã Israel Járape.
Maymáva Israel ñemoñare he’i:
Tupã ore Járape romomba’e guasúta ha he’ívante rojapóta.
Ha upéva upe árape voi Siquémpe, Josué omoĩ kuatiáre maymáva Israel guápe umi mba’e ha’e kuéra ojapo va’erã. Ko ñe’ẽ me’ẽ ha’e kuéra ojapóva, Josué omoĩ kuatia Tupã Ñandejára rembiapoukapy ñe’ẽ ryrúpe. Upéi omopu’ãuka peteĩ ita guasu upe yvyra máta guýpe oĩva Tupä Ñandejára rekohápe. Ha he’i Josué maymáva Israel guápe: Ko ita oĩta ko’ápe ku ñande rechárõ guáicha, ohendupágui opa umi mba’e Tupä Ñandejára he’i va’ekue ñandéve. Ko ita oĩta ko’ápe ani haguã ñande japu Tupã Ñandejára ndive. Upéi Josué omondo Israel guápe hógape ha oje’ói maymáva ijyvy teépe.
Opa ko’ã mba’e ojehu rire, omano Tupä Ñandejára rembiguái Josué, Nun ra’y. Omano orekópe 110 áño.
Tupã Ñandejára Ñe’ẽ.
SALMO ÑEMBOHOVÁI 15, 1-2a. 5. 7-8. 11
R. Nde hína che Jára ndaipóri ne jojáva
Tupã Ñandejára, eñangareko kena che rehe,
ne rendápe niko aguahẽ.
Tupä Ñandejára, nde hína opa mba’e chéve guarã.
Nde pópe oĩ che rekove. R.
Amomba’e guasúta Tupä Ñandejárape che resape’áva,
pyharekue jepe che py’a rugua guive che moarandu.
Opa árape Tupä Ñandejárare che mandu’a,
ha’e oĩ ramo che ypýpe nda’ái chéne. R.
Nde rehechaukáne chéve jeikove rape.
Ne rendápe aime ramo vy’águi che moenyhẽne.
Nde ypýpe vy’a ndopáiva
nde akatúape aime ramo. R.
ALELUIA Cf. 1Tes 2, 13
Aleluia.
Pe japyhy Tupä Ñandejára Ñe’ë, ani yvypóra ñe’ëicha,
pejapyhy uvei pe añete háicha, Tupä Ñandejára ñe’ëicha.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?
19, 13-15
Upe ramo heta mitã mimi ojereraha Jesús rendápe, ha’e omoĩ haguã ipo iñakãre ha oñembo’e haguã hese kuéra. Umi hemimbo’e kuéra katu, ipochy umi mitãme oguerúva ndive.
Jesús he’i ichupe kuéra: Peheja umi mitã tou che rendápe, ha ani pejoko. Umi ha’e kuéraicha guápe guarã niko hína ñesãmbyhy yvágagui oúva.
Ha omoĩ ipo iñakã ári kuéra. Upéi ha’e osẽ oho upégui.
Ñandejára Jesucristo Ñe’ẽ