VIERNES 16 DE AGOSTO

LECTURAS DEL VIERNES 16 DE AGOSTO

PRIMERA LECTURA

Ko’ágä   ñahendúta Tupã Ñandejára ñe’ẽ Jueces arandukápe oĩ háicha  

                                               24, 1-13 

Ohenói Josué opa karai kuérape, mburuvicha, moakãhára  ha ñorairõhára ruvicha kuérape. Ha maymáva Israel ñemoñare oñemboaty Siquémpe, Tupä Ñandejára renondépe. Ha he’i ichupe kuéra Josué: Kóicha he’i Tupã Israel Jára: “Yma pende ru kuéra ypykue Abraham ha Nacor ru Taré oiko ramo Éufrates ysyry mboypýri, omomba’e guasu va’ekue ambue tupã. Che agueru va’ekue ágotyo pende ypykue Abrahámpe ha ahechauka va’ekue  ichupe Canaán yvy. Ame’ẽ ichupe ta’ýra Isaac, ha Isaac rupi heta iñemoñare. Isaac katu mokõi ita’ýra va’ekue : Jacob ha Esaú. Esaú ha ita’ýra kuérape ame’ẽ va’ekue Seir ijyvyrã. Jacob ha ita’ýra kuéra katu oho Egíptope. Amondo va’ekue  upéi Moisés ha Aarónpe Egíptope ha sarambi ajapo va’ekue  umi upépe oikóva apytépe. Peẽme katu ponohẽ va’ekue upégui. Anohẽ ramo guare pende ru kuéra ypykuépe Egíptogui, umi upepegua ou va’ekue  hapykuéri kuéra kavaju ári ha karroita reheve Mar Rojo peve. Upépe pesapukái va’ekue  chéve ha amoĩ va’ekue  ipa’ũme kuéra arai ypytũ. Upéi ambou hi’ári kuéra y. Ojaho’ipa ite ichupe kuéra ha ojahogapa. Peẽ peikuaapa ko’ã mba’e che ajapo va’ekue  Egíptope.

Heta ára upéi peiko yvy ojeiko’ỹha rupi. Upégui pogueru va’ekue  amorreo kuéra yvýpe, oĩva kuarahy reike gotyo Jordán ysyrýgui. Umíva opu’ã va’ekue oñemoĩ pende rehe, che katu amoĩ ichupe kuéra pende pópe ha peẽ pehundi ichupe kuéra ha peñe momba’e ijyvýre. Upéi opu’ã oñorairõ haguã Israel ñemoñare ndive Zipor ra’y Balac, Moab retã ruvicha guasu. Ha’e ohenoika Balaam, Beor ra’ýpe, iñe’ẽ paje oity haguã Israel rehe. Che katu amboty che apysa umi mba’e he’ívape. Amo ipahápe ha’e pende rovasa. Ndahejái va’ekue  ichupe ojapo pende rehe mba’eve ivaíva. 

Upéi pehasa va’ekue  Jordán ysyry ha peguahẽ Jericópe. Umi upepegua ha ijere rupi oikóva: amorreo, ferezeo, cananeo, hitita, gergeseo, heveo ha jebuseo kuéra opu’ã oñorairõ haguã pene ndive. Opa umívape che aity pende pópe. Umi mokõi amorreo ruvicha guasúpe katu napehundíri peẽ pene rembiporu ñorairõme peiporúva reheve. Chete aha va’ekue  pene renonderã, amondýi ha amuña ichupe kuéra peẽ peguahẽ mboyve. Yvy che ame’ẽva peẽme na pene mbosyva ry’ái va’ekue, táva ame’ẽva peẽme napemopu’ãi va’ekue. Ko’ágã peiko upépe ha pereko pe’u va’erã mba’e peẽ peñotỹ’ỹ va’ekuégui.”

Tupã Ñandejára Ñe’ẽ.

SALMO ÑEMBOHOVÁI          135, 1-3. 16-18. 21-22. 24

R. Pemomba’e guasu Tupä Ñandejárape ha’e niko ipy’a porã

Pemomba’e guasu Tupä Ñandejárape ha’e niko ipy’a porã, 

Pemomba’e guasu Tupãme tuichavéva opa ambue tupãgui, 

Pemomba’e guasu Ñandejárape opa mba’e járape. R.

Ha’e oisãmbyhy va’ekue  hetã guápe yvy ojeiko’ỹha rupi, 

ha imborayhu ndopái araka’eve, ha’e ohundi va’ekue 

mburuvicha guasu mbaretépe, ha’e ojuka ojekyhyjevévape. R.

Ha’e omboja’o va’ekue  umíva yvy hetã guápe, 

ha ome’ẽ va’ekue  hembiguái Israel guápe imba’e teerã, 

ha’e ñane renohẽ va’ekue  ñande jopy vaíva po guýgui. R.

ALELUIA  Cf. 1Tes 2, 13

Aleluia. 

Pe japyhy Tupä Ñandejára Ñe’ë, ani yvypóra ñe’ëicha,

pejapyhy uvei pe añete háicha, Tupä Ñandejára ñe’ëicha. 

Aleluia. 

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                              

                        19, 3-12

Upe ramo Fariséo kuéra oñemboja Jesús rendápe omoñuhã haguã ichupe. Oporandu ichupe hikuái: Ikatúpa peteĩ ména opoi hembirekógui oimeraẽ mba’ére? 

Jesús he’i ichupe kuéra: Ndapeikuaái nga’u piko Tupä Ñandejára Kuatia Ñe’ẽme he’iha, Tupã Ñandejára ojapo ramo guare yvypórape iñepyrũmbýpe, ojapo hague kuimba’e ha kuña? He’ive avei: “Upévare pe kuimba’e oheja va’erã itúva ha isýpe, ojoaju haguã hembireko ndive, ha oiko mokõivégui peteĩ.” Péicharõ, upe guive ha’e kuéra ndaha’e véima mokõi yvypóra, peteĩntema. Upévare, yvypóra ndoipe’ái va’erã ojuehegui umi Tupã Ñandejára ombojoaju va’ekue . 

Upépe umi fariséo he’i ichupe: Mba’ére piko aipo ramo Moisés rembiapoukapýpe he’i kuimba’e ome’ẽ va’erãha hembirekópe kuatia jueja rehegua, ha upéi opoi ichugui ? 

Jesús he’i ichupe kuéra: Pende py’a hatãguinte Moisés oheja va’ekue  peẽme pepoi pene rembirekógui. Iñepyrũmbýpe ndaupéichai va’ekue. Che katu ha’e peẽme, “Oimeraẽva opoírõ hembirekógui, ha ndaha’éi ramo ñemoakã ratĩ haguére, pe kuimba’e omenda jevýrõ, oporomoakã ratĩ hína. Ha pe omendáva pe kuña ojepoívare, oporomoakã ratĩnte avei hína.” 

Upévo hemimbo’e kuéra he’i ichupe: Péicha oikótarõ peteĩ kuimba’e hembireko ndive niko, iporãve nomendái. 

Jesús he’i ichupe kuéra: Nda opavavéipe niko oñeme’ẽ ohecha kuaa haguã ko ha’éva peẽme. Umi Tupã Ñandejára ome’ẽvape, ha’e kuéra mante ohecha kuaa. Heta mba’ére niko peteĩ kuimba’e ikatu nomendái. Oĩ umi ou ypy guive ko yvy ári, ikatu’ỹva voínte oiko kuña ndive ha upévare nomendái. Oĩ avei umi ikatu’ỹva omenda oñeha’ỹi’o haguére, ha oĩ katu omenda’ỹva ñesãmbyhy yvágui oúva rehehápe. Upe oñeme’ëvape ko’ã mba’e ohecha kuaa haguã, to hecha kuaa. 

Ñandejára Jesucristo Ñe’ẽ