VIERNES, 9 DE AGOSTO

PRIMERA LECTURA 

Ko’ágä   ñahendúta Tupã Ñandejára ñe’ẽ Deuteronomio arandukápe oĩ háicha                                                   

4, 32-40

Kóicha he’i Mosés hetãguápe:

Peheka umi ára yma guarépe, umi ára peẽ peikove ypy mboyve guarépe, peguahẽ meve upe árape Tupã Ñandejára ojapo ramo guare yvypóra yvy ári. Peipyguara opa rupi ko yvy jerekuévo. 

Araka’e piko ojehu peteĩ mba’e péichagua? Oĩ piko ohendúva peteĩ mba’e péichagua? Oĩ piko peteĩ tetã oikovéva Tupã Ñandejára oñe’ẽ rire ichupe tata apytégui peẽmeicha? Oĩ piko Tupã Ñandejára ohóva oiporavo peteĩ tetã, tetã nguéra apytégui? Oĩ piko Tupã Ñandejára oporopy’a ra’ãva, ohechaukávo mba’e rechapyrã, oñorairõva oiporúvo pyapy mbarete ha oporomongyhyjéva, Tupã Ñandejára ojapo haguéicha pene resa renondetépe Egíptope? 

Tupã Ñandejára ohechauka va’ekue  peẽme ko’ã mba’e, peikuaa haguã ha’enteha Tupã Ñandejára ha ndaiporiha ambue. Ohenduka peẽme iñe’ẽ yvágagui, pene reko mbo’e haguã, ha pe yvyty ári ohechauka peẽme hata marangatu ha oñe’ẽ peẽme ijapytégui. Ohayhúgui pende ru ypykuépe, pende poravo peẽme ha ha’e voi oho pene renohẽ Egíptogui pyapy mbaretépe. 

Peẽ peguahẽvo ha’e omosẽ va’ekue  tetã nguérape tuichavéva ha imbaretevéva pende hegui pene moinge haguã ha ome’ẽ haguã peẽme ijyvy, ko yvy pene mba’éva gueteri ko’ágä  peve. Pene mandu’áke ko mba’ére ha ani pende resarái araka’eve: Tupã Ñandejára hína Tupã yvágape ha yvy ári. Ndaipóri ambue tupã. Pejapo hembiapoukapy ame’ẽva peẽme ko árape ha opa mba’e osẽ porãta peẽme ha pene ñemoñarépe. Peikóta pe yvýpe Tupã Ñandejára peẽme ome’ẽva opa árape guarã. 

Tupã Ñandejára Ñe’ẽ.

SALMO ÑEMBOHOVÁI                                  76, 12-16. 21

R. Che mandu’a imombe’upyrã Tupã ojapo va’ekuére,

Che mandu’a imombe’upyrã Tupã ojapo va’ekuére, 

ha mba’e hechapyrãva yma guarére, 

che akãme ambojere opa mba’e ojapo va’ekue , 

ha ajepy’a mongeta hembiapo kuére. R.

Háa Tupã Ñaandejára! ne rembipota niko imarangatu. 

Ndeichagua, Tupã Ñandejára tuicháva, piko oiméta? 

Nde hína Tupã Ñandejára rejapóva mba’e rechapyrã, 

ha rehechauka va’ekue nde pokatu opa apytépe. R.

Nde po rupi ete renohẽ ne retãgua, 

Jacob ha José ñemoñare kuérape. 

Moisés ha Aarón rupi 

ovecháicha ne retã reisãmbyhy. R.

ALELUIA                                  Mt 5,10 

Aleluia. 

Ovy’a va’erä umi oñemoakasäséva ichupe, oikóre teko jojápe, imba’e kuerarä Sambyhy Yvágapegua. 

Aleluia. 

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                

                                               16, 24-28

Upe ramo Jesús he’i hemimbo’e kuérape: 

Oime ramo che moirũséva toñemboesarái ijehegui, tohupi ikurusu ijapére, ha ta che moirũ. Pe hekovére hakate’ỹva, omanóta. Pe omanóva che rehehápe katu, oikovéta. 

Mba’épa oguenohẽne yvypóra oguerekopárõ opa ite mba’e ipópe, ha oñehundi ramo ha’e? Mba’eve! Mba’épa ikatúne yvypóra ome’ẽ oikove jevy haguã? Mba’eve! Che, yvypóraicha aju va’ekue, aju jeývo, ajúta che Túva reko mimbipa reheve ha hemimbou kuéra reheve. 

Ha upévo Tupã Ñandejára omoengoviáta peteĩ teĩme hembiapokue ojerure háicha. Añetehápe ha’e peẽme, ko’ápe oĩva apytépe oĩ nomano mo’ãiva che recha mboyve chéve, yvypóraicha aju va’ekue, ajúvo apórosãmbyhy haguã. 

Ñandejára Jesucristo Ñe’ẽ.