VIERNES XX DEL TIEMPO ORDINARIO

Ko’ágã ñahendúta Tupã Ñandejára ñe’ẽ Rut arandukápe oĩ háicha 1, 1-2 a. 3-6. 7-8. 14b-16. 22

Yma Israélpe ndaipóri ramo gueteri mburuvicha guasu oiko tuicha ñembyahýi upe tetãme. Judá ñemoñarekuéra yvýgui, táva Beléngui, osẽ peteĩ karai hembireko ha ita’ýra mokõi ndive, oho haguã oiko tetã Moábpe. Ko karai héra va’ekue Elimélec, hembireko Noemí ha ta’ýra mokõi katu Mahlón ha Quelión.

Upéi Noemí ména omano ha opyta ha’e imemby mokõi reheve. Ko’ãva omenda kuña Moab guáre. Peteĩva héra Orpa ha pe ambue katu Rut. 10 áño haguépe katu omano avei Mahlón ha Quelión ha opyta Noemí ha’eñomi, mena’ỹre ha memby’ỹre.

Ha ohendúvo Tupã Ñandejára imandu’a jevyha hetãre, ha oguereko jevymaha hikuái ho’u va’erã, Noemí imemby rembirekore mokõive ndive osẽ pe oikohágui ha oje’ói hikuái Judápe.

Tapére Noemí he’i umi mokõi imemby rembirekokuépe: Ta peho jevýnte pende sy rógape. Tupä Ñandejára to hechakuaa peẽme, peẽ pehechakuaa haguéicha chéve ha che membykuérape.

Hasẽ jevy hikuái. Ha Orfa ohetũ rire Noemíme oho hetãme. Rut katu opyta hendive. Ha Rut he’i ichupe: Anivétei ere chéve roheja haguã.
Nde rehohápe, che aháta, nde reikohápe, che aikóta, ne retã, ta che retã, ne Tupã, ta che Tupã.

Remanoháme amanóta, ha upépe añeñotỹta. Amano ramo mante ikatúne roheja. Ha roheja ramo amano’ỹre, Tupä Ñandejára to jahéi che rehe.

Upéicha ojevy va’ekue Noemí imemby rembirekore Rut, upe kuña Moabgua ndive. Oguahẽ hikuái Belénpe oñepyrũ jave koga’a seváda ñemono’õ kokuépe.

Tupã Ñandejára Ñe’ẽ.

SALMO ÑEMBOHOVÁI 145, 5-10

Opavave: To ñemomba’e guasu Tupã Ñandejára.

Ovy’a va’erã upe Jacob Tupã oipytyvõvape,
upe ojeroviáva Tupã Ñandejára rehe.
Tupã Ñandejára upe ojapo va’ekue yvága ha yvy,
yguasu ha opa mba’e ipype oĩva. O.

Ha’e niko nopyrũiva iñe’ẽre.
Oñemoĩ uvei ojejopy vaíva ykére,
ha omongaru iñembyahýivape.
Tupã Ñandejára opoi umi iñapytĩmby ojererekóvagui. O.

Tupã Ñandejára oheja umi ohecha’ỹvape ohecha jevy,
Tupã Ñandejára omopu’ã umi ikangývape,
Tupã Ñandejára ohayhu umi heko jojávape.
Tupã Ñandejára oñangareko umi mombyry guáre. O.

Ha ityre’ỹ ha iména manóvape ha’e oipytyvõ.
Heko vaíva rape katu ha’e ohundi.
Tupã Ñandejára niko mburuvicha guasu opa árape guarã.
Táva Sión! Ñandejára ne sãmbyhýta opa árape. O.

ALELUIA Cf. Sal 24, 4b.5a.

Aleluia.
Tupã Ñandejára ehechaukami chéve umi nde rape, che mboguata upe tape teko jeroviapývare.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 22, 34-40

Upe ramo umi fariséo ohendúvo Jesús omokirirĩ hague umi Saduséope, oñemboaty hikuái ha oho Jesús rendápe. Peteĩva, Moisés rembiapoukapy mbo’eha, omoñuhã haguãicha oporandu ichupe: “Mbo’ehára, mávapa umi Tupã Ñandejára rembiapoukapy apytépe mba’e guasuvéva”?

Jesús he’i ichupe: ‘Ehayhu Tupã nde Járape ne nde py’a ite guive, ne ánga rugua guive ha ne arandukue reheve.’

Kóva hína pe mba’e guasuvéva ha pe tenondeteguáva. Upéva rire oúva ojogua ichupe, ha he’i kóicha: ‘Ehayhu nde rapichápe rejehayhu háicha nde.’ Ko’ã mokõi tembiapoukapy ári oguapy hína Moisés rembiapoukapy ha opa mba’e maranduhára kuéra ombo’e va’ekue .

Ñandejára Jesucristo Ñe’ẽ