LECTURAS MIÉRCOLES 4º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Samuel arandukápe oĩ háicha 24, 2. 9-17

David he’i mburuvicha Joábpe, omoirũva ichupe: Tereho opa Israel ñemoñaregua rupi, Dan guive Beerseba peve, ha eipapa mbovýpa oĩ tetãgua aikuaa haguã.

Joab ome’ẽ mburuvicha guasúpe upe kuatia oĩháme umi ojepapa va’ekue réra, ha oĩ Israélpe 800.000 kuimba’e oĩva oho haguãicha ñorairõháme, ha Judápe 500.000.

David katu ohecha kuaa ojapo vai hague oipapaukávo tetã guárape, ha he’i Tupä Ñandejárape: Ivaíva niko ajapo. Ajerure ndéve Tupä Ñandejára, reheja rei haguã chéve, che rembiapo vaikue. Che tavýgui niko péicha ajapo.

Upe ára ambuépe, David opu’ã rire, Tupã Ñandejárape he’i maranduhára Gádpe, mba’e rechahára omba’apóva Davidpe guarã, ha he’i ichupe: “Tereho David rendápe ha ere ichupe toiporavo peteĩ ko’ã mbohapy mba’égui, ha che ajapóta upe ha’e oiporavóva.”

Gad oho David rendápe ha oporandu ichupe: Mba’épa reipotave: 7 áño ñembyahýi ne retãme, mbohapy mése reiko rekañy umi nemuñávagui, térã mbohapy ára mba’asy asãi ne retãme? Eiporavo Ko’ágã aha haguã amombe’u che mbouharépe. Ha David he’i Gádpe: Ajecha vai eterei aína. Opáichavo, iporãve ja’a Tupã Ñandejára ipy’a porãitéva pópe, ja’a rangue yvypóra pópe.

Upérõ Tupã Ñandejára omondo mba’asy asãi Israélpe upe pyhareve guive ára mbohapyha peve ha omano Dan guive Beerseba peve 70.000 tapicha. Tupã Ñandejára remimbou ohundítama hína Jerusalén, ha upévo Tupã Ñandejára oma’ẽ ha ombyasy pe ojapóva. He’i pe hemimboúpe: “Iporã mante, anive reporojuka!”

Upe jave Tupã Ñandejára remimbou oĩ hína Arauna jebuséo ojykyihápe trígo. Ha David ohechávo pe Tupä Ñandejára remimbou oporojukávape hína, he’i Tupã Ñandejárape: Che niko pe ajapo va’ekue ivaíva! Ha’e kuéra piko mba’e ojapo? Che nupãna chéve ha che róga guápe!

Tupã Ñandejára Ñe’ẽ

SALMO ÑEMBOHOVÁI 31, 1-2. 5. 6. 7

Opavave: Tupã, ehejarei kena che rembiapo vaikue ha che angaipa

Ovy’a upe ojeheja reívape iñangaipa
ha umívagui oiko tesarái.
Ovy’a upe hova mokõi’ỹva,
Tupã Ñandejára oheja reívape hembiapo vaikue. O.

Amombe’u ndéve che angaipa
mba’evete namokañýi,
che py’a pýpe arekógui ndéve aikuaaukávo,
umíva nde reheja rei chéve. O.

Upévare, opa nde rehe ojeroviáva,
oñembo’éne ndéve ojejopy vai jave,
umi y ojupi ha ojaho’i ramo opa mba’e,
ndohupitýi chéne ichupekuéra. O.

Nde hína pe che rehe reñangarekóva,
che pytyvõva ajejopy vai jave.
Vy’ápe che añuãmbáva
jejopy vaígui che pe’a jave. O.

ALELUIA Jn 10, 27
Aleluia.
Ñandejára Jesucristo he’i:
Che ovechakuéra ohendu che ñe’ẽ,
Che aikuaa ichupe kuéra ha ha’ekuéra oho che rapykuéri.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 6, 1-6

Upe ramo Jesús oho upégui oikove ypy haguépe, ha hemimbo’e kuéra oho hendive. Oguahẽvo pytu’uha ára oñepyrũ oporombo’e judío kuéra tupaópe. Ha heta ohendúva Jesúspe, ijurujái ha oporandu ojupe: Moõgui piko oikuaa kóva hetaite mba’e? Moõgui piko oguenohẽ imba’ekuaa ha umi mba’e rechapyrã ojapóva? Ndaha’éi piko kóva ku karpintéro, María memby, ha ityvýrakuéra Santiago, José, Judas ha Simón? Ha heindykuéra nga’u piko ndoikói ñande apytépe?

Ha ndojeroviái hese hikuái. Jesús katu he’i ichupekuéra: Opa rupi niko maranduhára kuérape oñembojerovia, hógape ha hogagua apytépe, ha oikove ypy haguépe katu nahániri.

Ndaikatúi ojapo upépe mba’eve hechapyrãva, mbovymi hasývarente omoĩ ipo ha omonguera. Ha ohecha ramo ndojeroviaiha hese hikuái. Jesús ohóva umi táva aguĩha rupi oporombo’évo.

Ñandejára Jesucristo Ñe’ẽ